कन्टिर–बाबू नाकको डाँडीमा दाहिने हातको चोर र बूढी–औँला राखेर सोचमग्न छन्– खत्तम त खत्तम ‘ उल्टो पटिबाट खत्तम भयो ।
पुस ५ देखि माघ २३ सम्म कति दिन हुन्छ भनी एक–दुई गर्दै गन्दै जाँदा कन्टिर–बाबूले ठ्याक्क ४८ दिन पुर्याए । ती ४८ दिन लगातार डर्टी पिक्चरको राजनीतिक सिरियल हेरेका कन्टिर–बाबू अहिले आएर छक्क परेका छन् ।
उनी त डर्टी पिक्चर क्लाइमेक्समा पुगिसक्यो र चाँडै खत्तम होला भन्ने सोचिरहेका थिए । तर कन्टिर–बाबूको विश्वासमा कुठाराघात गर्दै ओल्बाले घोइ–पखाली चिटिक्क पारेको सडक कुल्चिएर घोषणा गरे– यो त कास्टिङमात्र हो पिक्चर अझै बाँकी छ । ओल्बाले पिक्चरको बाँकी भाग फागुन १ गते बटौली र ८ गते घोगापुल छेउछाउ मान्छे भेला पारेर देखाउने रे !
अरे यार, यो के खालको होडबाजी भइरहेको छ सडकमा ? सरकारमा भएको राजनीतिक दल आफैँले सडक प्रदर्शनको होडबाजी गर्नुलाई कन्टिर–बाबूले अनौठो मानेका छन् । अल्कोमुनियामा त यस्तो हुँदैनथ्यो । लोकतन्त्रमा यो कहीँ नभएको जात्रा कसलाई देखाउन गरेको हो ?
हिजोका दिनमा पञ्चहरू र्याली गर्थे, सडक सफा गर्थे, राजाका फोटो टाँस्थे र राजालाई देखाउँथे । अहिले ओल्बाले कसलार्ई देखाउनु र खुसी पार्नु छ ? आफ्नो फोटो दरबारमार्गका पोल–पोलमा टाँस्न लगाएर आफैँ हेर्दै दङ्ग पर्ने ओल्बाको भित्री चाहना थियो भने कन्टिर–बाबूलाई भन्नु केही छैन । तथापि ओल्बा र समर्थकलाई कन्टिर–बाबू भन्न चाहन्छन् कि दरबारमार्ग अघि उभिँदैमा, पोलमा फोटो टाँस्दैमा केही राजा हुँदैन ।
तीन वर्षयता ओल्बामा बढेको फोटो र शक्ति–प्रदर्शन मोह थामिनसक्नुको छ । आफ्नो फोटो मोह गर्ने यस्ता नेता विरलै देखिन्छन् । यस्त मान्छेलाई सर्वहाराको नेता भन्ने कि सामन्ती–पुँजीपतिको ? कन्टिर–बाबू दोधारमा छन् ।
कन्टिर–बाबू नारायणहिटीसामु कहिले नभएको त्यस प्रकारको कार्यक्रम व्यवस्थापनको भने प्रशंसक हुन् । यसअघि राजाको सवारीमा समेत यति मजाले बाटो पखालिँदैनथ्यो, फोटो कटिङ र स्क्रिन सेट पनि गजब नौलो थियो । ओल्बाको शक्ति प्रदर्शनको सकारात्मक पक्ष भनेकै घुम्ती शौचालयको पर्याप्तता, स्वास्थ स्वयमसेवक, आपतकालीन शिविर, खानेपानीको व्यवस्था, सादापोशाकवाला सुरक्षाकर्मीको बाहुल्यता, समापन पश्चातको सरसफाइ थियो ।
बाँकी त हात्ती र हात्तीछाप चप्पल उस्तै भयो । ओल्बाबाट ठुलै राजनीतिक घोषणा हुने बहु–प्रचारित अपेक्षा थियो । तर भइदियो टायँ–टायँ फिस ! उही डर्टी घोचपेच र खोक्रो भाषणमा कास्टिङको कुरा मिसाएर महत्त्वपूर्ण समय बिताए बाबैले ।
अझ अस्थिरता चाहिँदैन, स्थिरताका लागि पाँच वर्षमा तीन पटकसम्म पनि चुनाव गर्नुपर्छ, त्यही हो लोकतन्त्र भनेर ओल्बाले भन्दा पनि ताली बजाए पछुवाहरूले । होइन, मान्छेहरू ओल्बाका पछाडि कुरा बुझेर लागेका छन् कि नबुझी लागेका हुन् ? कन्टिर–बाबूले कुरा बुझ्न सकेका छैनन् ।
उनलाई सडक प्रदर्शन क्रममा रहेको नेपाली राजनीतिक डर्टी पिक्चरको कास्टिङ भने झुर लागेको छ । किनभने चिसो लागेर हो कि नमिठो लागेर हो कास्टिङमै आँसु पुछापुछ भयो !
साभार : koshionline
