कन्टिर–बाबू भाग्यवादी होइनन् । हमेसी संयोगले नै सबै कुरा जुर्छ भन्नेमा उनी सहमत छैनन् । तर पनि कन्टिर–बाबूलाई आफू पूर्वीय दर्शन–संस्कृतिको अनुयायी भएकोमा चाहिँ गर्व छ । नचाहँदा–नचाहँदै पनि नियमित आकस्मिकताको तर्क र अस्तित्वलाई उनी अस्वीकार गर्न सक्दैनन् ।
ज्ञानलालले प्रजातन्त्र निलम्बनसहित कु गरेको दिन माघ १९ सँग जोडिएका बिर्सनलायक धेरै घटनाको संयोग मिलेको धेरैलाई थाहै छ । हुँदाहुँदा म्यानमार पनि त्यही संयोग–शृङ्खलामा जोडिन आइपुगेको देखेर भने कन्टिर–बाबू चकित छन् ।
म्यानमार भन्या सुची दिदीको त्यही बर्मा हो, जहाँ सेनाले फेरि राजनीतिक कु र जनअधिकार हरण गरेको छ, नेताहरूलाई थुनेको छ । सञ्चार सम्पर्क अवरुद्ध पारेको छ । त्यहाँ सेनाले यस्तो हर्कत यसअघि पनि गरेको थियो । अरे, आजको लोकतान्त्रिक जमाना पनि सैनिक कु ? क्या अचम्म ?
तर कन्टिर–बाबू बर्माको कुरामा खासै अचम्भित हुने पक्षमा छैनन् । यहीँ नेपालमा ओल्बाले लोकतन्त्रको नाममा संविधानलाई र ताजा भनिएको जनादेशलाई लोप्पा खुवाएर ‘सफ्ट कु’ भ्याइदिए । बर्मामा त सधैँ सेनाकै हालिमुहाली छ ।
उता बर्मेली सेनाले ताजा जनादेशका लागि फेरि चुनाव गराउने घोषणासमेत गरेको छ, जसरी हाम्रा ओल्बाले चुनाव गराउने घोषणा गरेका छन् । हरेक निरङ्कुश शासकले जनताका आँखामा छारो हाल्न चुनावलाई हतियारका रूपमा प्रयोग गर्छ नै, यसलाई लोकतान्त्रिक अभ्यास र संयोग कसरी मान्ने भन्ने प्रश्न कन्टिर–बाबूले सुरुदेखि नै गर्दै आएका छन् ।
यता नेपाली सेनाको माघ १९ कै कुसाइत पारेर चक्रपथमा बख्तरबन्द हतियारसहित मार्स–पास गरेको छ । यसलाई सेनाले नियमित अभ्यासका लागि गरेको काम बताएको छ । यत्रो वर्ष गर्नु नपरेको अभ्यास माघ १९ मै किन गर्नुपरेको भनी कन्टिर–बाबूले चिनेका सरकार पक्षधर एक ठुलै नेतालाई सोध्दा उताबाट जबाफ आयो– नचाहिने कुरा नगर्नू, यो त संयोग परेको मात्र हो ।
तर यो घटनालाई कन्टिर–बाबू ज्ञानलालले कु गरेकै दिनको सम्झना नेपालीलाई दिलाउन सेना अभ्यासको नाममा जानीजानी सडकमा आएको ठान्छन्, संयोगमात्र मान्न तयार छैनन् ।
कहिले नेपालमा, कहिले बर्मामा १९ गतेको भूतले मान्छे तर्साएको–तर्सायै छ तर कन्टिर–बाबू तर्सिनेवाला छैनन् । यसबेला यदि कोही राजनीतिक रूपमा तानाशाह बनेर उठ्न खोज्दै छ भने त्यस्तो हुर्किन खोजेको तानाशाहले कन्टिर–बाबूको यो सल्लाह चाहिँ जहिल्यै हेक्का राख्नू– पात्रोमा माघ १९ मात्र छैन, फागुन ७, जेठ १५ जस्ता थितिमिति पनि छन् ।
