हजार जिब्रा भएका शेषनागले पनि बयान गर्न नसकेको शिवजीको महिमा विचरा कन्टिर–बाबूले कसरी गरुन् ? अझ शिवरात्रिका दिन कैलाश–डाँडा, देवपत्तन, किरातेश्वर, वनकाली, मृगस्थली, विश्वरुपा, गुह्येश्वरी, राम मन्दिर, श्लेषमान्तक आदि–इत्यादिमा छेउकुनामा शिवभक्त युवा–युवतीबाट प्रदर्शित हुने रमिताको बयान गर्न त दुई हजार जिब्रा भएका शेषनागले पनि सक्दैनन् होला भन्ने कन्टिर–बाबूलाई लागिरहेको छ ।
शिवरात्रिका दिन कन्टिर–बाबू बिहानदेखि अन्यमनस्क भावमा छन् । उनले सुरुमा जसलाई भेट्यो उसैलाई ‘जय शम्भो‘ भन्दै थिए, बीचमा अचानक एक जना मित्रले ‘जय शम्भो गाँजा कम’ भो भनेर जबाफ फर्काएपछि भने उनी फतफताउन थाले ।
तर जहाँसम्म उनको फतफत्याइको कारणलाई अथ्र्याउने सन्दर्भ छ, उनी शिवरात्रिका नाममा भित्रिएका विकृत व्यवहारविरुद्ध फतफताइरहेका हुन् । हो पनि, भगवान् शिवको प्रिय दिन–रात मानिने शिवरात्रिको तिथिलाई उनै शिवका नाममा उनैका भक्तले मानमर्दन गरेको देखेपछि कन्टिर–बाबूको चित्त नबुझ्नु स्वाभाविक छ ।
अरे यार, नागा बाबा भनाउँदाले पशुपतिमा देखाउने अनपेक्षित करतब, शिवबुटीका नाममा हुने गाँजाको निर्वाध कारोबार आदिले पवित्र पाशुपत क्षेत्रको सतप्रतिशत मानमर्दन गरिरहेको छ । त्यस्तै, एक सर्को दुनियाँ अर्को भन्दै सबै पुरुषले आफूलाई शिवजी र सबै महिलाले आफूलाई पार्वती सम्झेर बेरोकटोक विकृति प्रश्रय दिने सन्दर्भप्रति कन्टिर–बाबूको घोर आपत्ति छ ।
अझ शिवरात्रिका दिन श्लेषमान्तक वनमा अङ्ग्रेजी डिजे बजाएर जथाभावि उफ्रिने सन्दर्भले कन्टिर–बाबू थप चिन्तित छन् । सनातन संस्कृतिको संवर्धन हुनुपर्ने पक्षमा सधैँ अडिग कन्टिर–बाबूलाई लाग्छ– तर त्यसको पनि एउटा सीमा हुन्छ । गुलियो पनि धेर भयो भने तितो हुन्छ ।
यो पनि शिवको त्यो पनि शिवको, सारा संसार शिवको म पनि शिवको भन्ने भक्ति भजन सुनेका कन्टिर–बाबूलाई थाहा छ शिव भनेको मङ्गल, कल्याण, आनन्द, मुक्ति, मोक्ष, समाप्ति पनि हो । यस्तोमा विकृतिरहित आनन्दको खोजीमा लाग्न सबै शिवभक्तहरूलाई कन्टिर–बाबूको सुझाव छ ।
शिवबुटी भन्दै गाँजा, भाङ, धतुरोको अधिक प्रयोगले मान्छेको ज्ञान, बुद्धि, विवेक समाप्त पार्न पनि सक्छ । किनकि कन्टिर–बाबूलाई मात्र होइन, दुनियाँलाई थाहा छ– जम्माजम्मी एक जना शिवले मात्र हो विष पनि पचाउने । अरू सबै अनुयायी मात्र हुन् । अनुयायीको हुने प्रयत्न बत्तीमा पुतली डढ्न खोज्नुभन्दा पर्तिर होइन ।
शिव सम्झिने विशेष दिनमा कन्टिर–बाबूका तर्फबाट सबै शिवभक्तहरूमा विकृतिरहित शिवरात्रिको घोर शुभकामना ! जय शम्भो !
साभार : koshionline
