विकासशील र कम विकसित देशमा राज्य सञ्चालनका आफ्नै समस्या र बाध्यता हुन्छ भन्थे, कन्टिर–बाबूलाई पनि हो लाग्न थालेको छ । शायद यसै सेरोफेरोमा एउटा सेटिङ राज्यको अस्तित्व स्वीकार गरिन्छ ।
नेपालको वर्तमान राजनीतिक विश्लेषणको प्रयत्न गर्दा कन्टिर–बाबू उल्लिखित प्रवृत्तिलाई अस्वीकार गर्न सक्ने अवस्थामा छैनन् । दुखद् त के छ भने राज्य सञ्चालनको प्रवृत्तिको बाछिटा स्वाभाविक रूपले अन्य क्षेत्रमा पनि पर्दो रहेछ ।
आज कन्टिर–बाबूलाई सामुदायिक रेडियोवालाहरूको कुरा गर्न मन लागेको छ । भन्दा हाम्रो काम सतप्रतिशत सामुदायिक हो भन्छन्, देख्दा सतप्रतिशत सामुदायिक देखिँदैन ।
त्यसमाथि सामुदायिक भनिने रेडियोवालाहरूको संस्था छ नि अकोराब भन्ने, त्यहाँ पनि एक किसिमको सत्ता छ र सेटिङ उपलब्ध छ । ज्यान गए पद नछोड्ने हाम्रो ओल्बाको फोटोकपीवाला सेटिङ ।
अधिवेशन आफूअनुकूल हुने नदेखिएपछि एक लुच्चा बहानामा अध्यक्ष र महासचिव कमरेडहरू झ्याप्प मिलेछन् र फ्याट्ट विज्ञप्ति छापेछन्– आजदेखि हुने भनिएको अधिवेशन विशेष कारणवश स्थगित गरिएको छ ।
त्यस्तो अनपेक्षित सूचना थाहा पाए देखि कन्टिर–बाबू सोचिरहेका छन्– तैट्, यी नेतृत्वमा रहेका भनिएकाहरूले अन्तिम समयमा यो के गरेको होला, नाटक कि नौटङ्की ?
कन्टिर–बाबू सोध्छन्– के अकोराब भनेको कोही एक–दुई व्यक्तिको मोजाको संस्था हो ? अधिवेशनका लागि सबै प्रतिनिधि काठमाडौँ आइसके, उनीहरू नयाँ नेतृत्वका लागि मतदानको तयारीमा लागिसके । तर लाज पचेका पुराना तोरीहरूले नेतृत्व नछोड्ने रे !
त्यसो त अधिवेशन पक्षधरहरूले पनि काउन्टर त दिएकै छन् । कन्टिर–बाबूका अनुसार बाँकी खेल रमाइलो हुनेवाला छ । अधिवेशन हुन्छ कि हुन्न ? भन्ने जिज्ञासासहित कन्टिर–बाबूको पुरक प्रश्न छ– आखिर ‘सुगो’ सेटिङ के हो ?
भनिन्छ, अनुहारमा जतिसुकै मुखौटा धारण गरे पनि जतिसुकै पाउडर घसे पनि समय आउँदा अनुहार उदाङ्गिन्छ, बाघको खोल ओढेको स्याल हिँडाइबाटै चिनिन्छ ।
कन्टिर–बाबूलाई थाहा छ– जुनसुकै नामका कम्युनिस्ट हुन् तिनले आफ्नो अनुकूलतामा लोकतन्त्रको व्याख्या गर्छन् र कम्युनिस्टको मूल चरित्र जोगाउने प्रयत्न गर्छन् । तिनीहरू ‘संसद् भनेको खसीको टाउको राखेर बाख्राको मासु बेच्ने ठाउँ हो,’ भन्ने कमान्डबाट दीक्षित हुन्छन् । संसदीय व्यवस्था ध्वस्त पार्नु कम्युनिस्टहरूको अन्तर्राष्ट्रिय कार्यदिशा हो ।
कन्टिर–बाबूका अनुसार तर्क–वितर्क जे गरे पनि सारमा कम्युनिस्टहरूको मार्गचित्र लोकतान्त्रिक चरित्र, संस्था र मूल्य–मान्यताविरोधी नै हुन्छ । अकोराबका सुगोहरूको काममा पनि यही तथ्य प्रतिबिम्बित भएको हो । कोई सक ?
साभार : koshionline
