चोक्टा खान गएका एक जना नेता झोलमा डुबेर मरेछन् । विचरालाई एउटा ठुलो पाटीको अध्यक्ष हुने रहर लागेर उखपात भएको रहेछ ।
त्यसका लागि उनले असली, साबिकको, पुरानो आदि शब्द प्रयोग गरी झुक्याइने बरमाझियाको पेडाजस्तो सर्वथा सजिलो एउटा विदेशी ब्रान्डवाला पाटी रोजेछन् । तर उनले जुन पाटी रोजेका थिए, त्यसमा पहिलेदेखि गजधम्मप्रसादको हालीमुहाली रहेछ । अलिपछि एक जना पाहुना पनि थपिएछन् ।
ती पाहुनाको नियत पनि ठुलो पाटीको एक्लो अध्यक्ष हुने रहेछ । त्यसैबीच उनीहरू पाटी फुटाऊ र राज गर भन्ने रणनीतिमा लागेछन् । पहिल्यैदेखि खाइखेली पल्केका गजधम्मप्रसादले भने हालीमुहाली छोड्न मानेनछन् ।
अन्ततः ती नेता र पाहुना मिलेर उस्तै खालको नाममा पुरक गतिविधि गर्न थालेछन् । तर उनीहरूले आफ्नो भनी दाबी गरेको नाम त उनीहरूको मौलिक रहेनछ । अर्कैको कपी–पेस्ट पो रहेछ ।
विचरा नेतृत्व दाबी गरिरहेका तीनै जना महामहिमको सपना हुरीले उडाएछ । २०७७ फागुन २३ गते सर्वोच्च ठाउँबाट आएको हुरीले गर्नुसम्म गरेछ । चल्तीवाला ब्रान्डेड पाटीको नाम सुरुमा जसको हो उसैको हुने टुङ्गो लागेपछि ती नेताले नैेतिकताका आधारमा झोलमा डुबेर मर्ने निष्कर्ष निकालेछन् ।
नैतिकता शीर्षकमा लेखिएको यो कथा कन्टिर–बाबूको ब्रान्ड–न्यु सिर्जना हो । कसैको व्यक्तिगत जिन्दगीसँग मेल खाएमा संयोग मात्र हुनेछ । किनकि नेपालमा नेतामा नैतिकताको प्रश्न उठाउनु निकै जोखिमपूर्ण काम हो ।
देशको वर्तमान राजनीतिका सम्बन्धमा कन्टिर–बाबूको निष्कर्ष छ– अपना काम बनता, भाँड में जाए जनता ! नेता भनाउँदाहरू कति मतलबी ? जेमा पनि आफ्नो दाबी ठोक्ने, जे कुराको पनि आफ्नै अनुकूल व्याख्या गर्ने ।
अब हेर्नुहोस्, दुनियाँ अचम्भित पार्नेगरी सर्वोच्च ठाउँबाट कट्टेल सरकोे पक्षमा भएको उद्घोषले मनमा जतिसुकै चोटपटक लागे पनि त्यसलाई नेताहरूले आफ्नो जितको रूपमा व्याख्या गरे ।
लो सुन लो बात ! यो फैसलापछि ओल्बाको खेमामा त खुसीयाली नै छाएछ । त्यसो त सर्वोच्चले राजनीति गरयो भन्नेको पनि कमी छैन छैन मुलुकमा । त्यस्ताहरूको तर्कअनुसार संसद् पुनःस्थापनाका सन्दर्भमा ओल्बालाई हराएजस्तो गरेको सर्वोच्चले आधिकारिकता विवादमा भने ओल्बालाई जिताइदियो रे !
यता नेकपा कट्टेल सरको पोल्टामा गएपछि त्यसअघि एक भए भनिएका नेकपा एमाले र माओवादी केन्द्र अलग–अलग भएको अर्थ लगाइएको छ । चुच्चे ढुङ्गो उही टुङ्गो भने जस्तो दुवै पार्टी निर्वाचनअघिको हैसियतमा पुगेको बताइन्छ ।
त्यसो हो भने अब झल–माधव कता जाने हुन् ? उपनिर्वाचनमा नेकपाको नाम र सूर्य चिन्ह लिएर चुनाव जितेकाहरूको हैसियत के हुने हो ? यतिबेला कन्टिर–बाबूको मनमा यस्तै प्रश्न उठेको छ । तर कन्टिर–बाबू यस विषयमा खासै बोल्ने मुडमा छैनन् ।
तर कन्टिर–बाबूलाई लागिरहेको छ– खुच्चिङ पर्यो, बडो ठूला भनाउँदा कमनिस्टहरू मिलेर सानो ठानिएका कट्टेल सरलाई पेल्न खोजेका थिए । मच्चिए–मच्चिए थच्चिए !
यस्तो अवस्थामा सन्ध्या र उदाउँदो सूर्यका आधारमा ओल्बाले त चित्त बुझाउने प्रयत्न गर्लान् तर ठुलो भाग खोस्ने प्रयत्नमा रहेका झप्रमहरूले के गर्ने होलान् ? आखिर माया में दोनो गए, राम मिले ना श्याम !
साभार : koshionline
