पछिल्लो समयमा बलिउडमा राष्ट्रवादी फिल्महरुले राम्रो व्यापार गर्न थालेपछि निर्माता तथा अभिनेताहरुको ध्यान यसैतिर तानिएको छ ।
खासगरी बलिउडका दुई सुपरस्टार अजय देवगन र अक्षय कुमार यस्ता फिल्मको निर्माणमा जोडतोडले लागेका छन् ।
हालै लद्दाखको गलवान उपत्यकामा चिनियाँ सैनिकसँगको झडपमा २० भारतीय सैनिकले ज्यान गुमाएको घटनामा पनि फिल्म बन्ने भएको छ ।
‘भुज’ नामक भारतीय सेनाकै विषयको फिल्मपछि अजय देवगनले यो हिंसात्मक झडपलाई लिएर फिल्म बनाउने घोषणा गरेको समाचारहरुमा जनाइएको छ ।
अभिनेता देवगनले पछिल्लो समय वीरता र शक्ति प्रस्तुत गर्ने चरित्रमा अभियन गर्दै आएका छन् ।
यसै वर्ष आएको उनको ‘तानाजी’ले निकै राम्रो व्यापार गरेको थियो । फिल्मका बाँकी कलाकारबारे बताइएको छैन ।
