पछिल्लो समय बलिउडमा वास्तविक घटना र कसैको जीवनमाथि आधारित भएर फिल्म निर्माणको होडबाजी चलिरहेको छ ।
‘भाग मिल्खा भाग’, ‘दंगल’, ‘सुल्तान’, ‘धोनी’ जस्ता फिल्म सफल भएपछि बायोपिक फिल्म निर्माणमा निर्माता तथा निर्देशकहरु आकर्षित भएका छन् । नेपालमा भने उति धेरै बायोपिक फिल्म निर्माण भएका छैनन् ।
बनेका पनि दर्शकले रुचाएका छैनन् । यस्तैमा, एक चर्चित व्यक्तिको जीवनीमा नेपाली फिल्म निर्माण हुन लागेको खबर बाहिरिएको छ ।
लभस्टोरी फिल्म निर्माणमा आफूलाई अब्बल सावित गरेका निर्देशक दिनेश राउत र अहिलेका हटकेक अभिनेता प्रदीप खड्काबीच टिमअप भएको प्रोजेक्ट गायक अरुण थापाको बायोपिक रहेको जानकारी प्राप्त छ ।
यद्यपि, यस विषयमा निर्माण टिमले मुख खोलेको छैन । फिल्मीखबरलाई गोप्य स्रोतले दिएको जानकारी अनुसार, फिल्ममा गायक थापाको गायन यात्रादेखि प्रेम जीवनसम्म समेटिनेछ ।
‘ऋतुहरुमा तिमी हरियाली बसन्त हौ’, ‘चोट के हो, बेथा के हो’, ‘जति माया लाए पनि’ लगायत दुई दर्जन बढी लोकप्रिय गीतमा स्वर भरेका गायक अरुण थापाको भूमिका पर्दामा प्रदीपले निभाउनेछन् ।
५० वर्षअघिको सेटअपमा फिल्म तयार गरिनेछ । ०५६ साउन ५ गते यस संसारबाट बिदा भएका गायक थापाकी एक छोरी छिन्, करुण थापा । उनी अष्ट्रेलियामा बस्ने गरेकी छन् ।
बायोपिक फिल्म बनाउन सम्बन्धित व्यक्ति वा उसको परिवारको अनुमति चाहने हुँँदा निर्देशक दिनेश थापाको टिम गायक अरुण थापाकी छोरीसँग भेट गर्ने सोचमा रहेको स्रोतले बताएको छ । केही हप्तादेखि फिल्मको स्क्रिप्टमा भने काम भइरहेको छ ।
स्रोतका अनुसार, गायक अरुण थापाको २१औं स्मृति दिवसको अवसरमा साउन ५ गते फिल्मको औपचारिक निर्माण घोषणा गर्ने तयारीमा निर्माण टिम छ ।
फिल्मलाई प्रभु बैंकमा आबद्ध एक व्यक्तिले निर्माण गर्न लागेको जानकारी प्राप्त छ । फिल्मको कथा विकास सुवेदी र निर्देशक राउतले मिलेर लेखिरहेका छन् । अर्को वर्षको सुरुवातमा फिल्मको छायांकन हुने बताइएको छ ।
