दक्षिणपूर्वी युरोपमा पर्ने अल्बानियामा मंगलबार आएको ६.४ रेक्टर स्केलको शक्तिशाली भूकम्पमा परि नौ जनाको मृत्यु भइसकेको छ भने ६ सय बढी घाइते भएको खबर गरिएको छ ।
तीमध्ये एक व्यक्तिको आत्तिएर झ्यालबाट हाम फाल्दै गर्दा मृत्यु भएको रक्षा मन्त्रालयकी प्रवक्ताले जानकारी दिएकी हुन् । राजधानी टिरानाबाट ३४ किलोमिटर उत्तरपश्चिममा बिहानको समयमा आएको सो भूकम्प तीन दशककै सबैभन्दा शक्तिशाली रहेको स्थानिय निकायको भनाइ छ ।
यसको केही घण्टापछि बोस्नीयामा पनि अर्को छुट्टै भूकम्पको धक्का महसुस गरिएको थियो जसमा भने क्षतिबारे कुनै खबर गरिएको छैन । अल्बानियाका प्रधानमन्त्री एडि रामाले ट्वीट गर्दै ठूलो क्षति पुगेको र आफूहरु सकेसम्म छिटो प्रभावित क्षेत्रमा उद्धार गर्न पुगिरहेको बताएका हुन् । स्थानीय मिडियाका अनुसार हालसम्म ६०० भन्दा बढी घाइतेको उपचार गरिएको छ । अनगिन्ती भवनहरु भत्किएको हुँदा उद्धारकर्मीहरु जिवितको खोजीमा बिहानदेखि खटिरहेको बताइएको छ ।
थुप्रै मानिसहरुले आफ्ना परिवारका सदस्यसँग सम्पर्कमा आउँदा उद्धारको पर्खाइमा बसिरहेको भन्ने जनाएकाले अझै धेरै जिवितहरुलाई उद्धार गरिनुपर्ने बताइएको छ ।
पहिलो भ्रूकम्पपछि ५.३ रेक्टरसम्मका थुप्रै पराकम्पन महसुस गरिएको बताइएको छ । यसअघि १९७९ मा आएको ६.९ रेक्टर स्केलको भूकम्पमा परी १३६ को मृत्यु भएको थियो भने हजार भन्दा बढी घाइते भएका थिए । जिवितको खोजी गर्दैगर्दा उद्धारकर्मीहरुले एक हजुरआमाले अंगालो हालि आफ्नो नातिलाइ बचाएको अवस्थामा फेला पारेका हुन् ।
एजेन्सी