नरेन्द्र ढकाल
गोरखा – पर्यटक भित्राउन भन्दै गण्डकी गाउँपालिकाको त्रिशुलीमा रयाफ्टिङ आयोजना गरिएको छ ।
गण्डकी गाउँपालिका वडा नम्बर ६, ७ र ८ को आयोजना तथा गाउँपालिका कार्यालयको ब्यवस्थापनमा शनिबार कार्यक्रम भएको हो । ‘गण्डकीमा पर्यटनको अथाह सम्भावना छ’ वडा नम्बर ८ का अध्यक्ष रामप्रसाद रेग्मीले भने ‘अहिलेसम्म पारी धादिङ तिरबाट मात्रै रयाफ्टिङ हुन्छ, त्यसले हाम्रो गाउपलिकालाई कुनै फाइदा छैन, अब हाम्रो तिरबाट पनि चलाउनुपर्छ ।’
त्रिशुली नदीसंग सिमाना जोडिएको गण्डकीको वडा नम्बर ७, ८ र ९ सहित ५ वटा वडालाई लक्षित गर्दै सिजनमा रयाफ्टिङ सञ्चालनका लागि सम्भाब्यता अध्ययनका लागि शनिबार ‘ट्रायल’ गरिएको उनको भनाई छ ।
रयाफ्टिङमा ४० भन्दाबढिको सहभागीता रहेको थियो । गण्डकी गाउँपालिका वडा नम्बर ८ को सिउरेनीटारदेखि ७ हुँदै ६ सम्म त्रिसुली नदीमा करिब दुई घण्टा रयाफ्टिङ चलेको थियो ।
कार्यक्रममा गोरखा क्षेत्र नम्बर १ का प्रतिनिधी सभा सदस्य हरीराज अधिकारी, गण्डकी प्रदेशका कृषी सहकारी मन्त्री लेखबहादुर थापा, प्रमुख जिल्ला अधिकारी देवेन्द्र लामिछाने, एसपी ओमप्रसाद अधिकारी लगायतको समेत सहभागिता रहेको थियो ।
रयाफ्टिङ कार्यक्रमको समापनमा बोल्दै प्रतिनिधिसभा सदस्य हरिराज अधिकारीले समग्र बिकासका लागि आन्तरिक पर्यटन प्रर्वद्धन पनि महत्वपूर्ण र आवस्यक रहेकाले त्यस्ता कार्यक्रमलाई निरन्तरता दिनुपर्नेमा जोड दिए । त्यस्तै आँबुखैरेनी देखि सिउरेनीटार सम्म गोरखा तर्फ राजमार्ग बनाउन सके गोरखाको बिकासमा ठुलो मद्धत पुग्ने सांसद अधिकारीले बताए ।
राष्ट्रिय गौरवको बुढीगण्डकी जलविद्युत आयोजना निर्माण सम्पन्न हुने र राजमार्गले गोरखा जोड्ने भएपछि मात्रै बिकासको गती देखिने भन्दै उनले मुआब्जा छिटो तोक्न नसकेको प्रति दुःख ब्यक्त गरेका छन् ।
भ्रमण वर्ष सन् २०२० लाई लक्षित गर्दै पर्यटकीय गन्तव्यको खोजी र पर्यटन प्रर्बधनका लागि जनप्रतिनिधि सहित त्रिशुलीमा जलयात्रा आयोजना गरिएको गण्डकी गाउँपालिकाका प्रमुख प्रशासकिय अधिकृत राकेश गुरुङले बताए ।
