गोरखा समाचारदाता
गोरखा – गोरखा क्षेत्रनम्बर १ का प्रतिनिधिसभाका सांसद हरीराज अधिकारीले आफूले अध्ययन गरेको नवनिर्मित विद्यालय भवनको आज (सनिबार) एक कार्यक्रमका वीच उद्घाटन गरेका छन ।
गण्डकी गाउँपालिका ५ स्थित दरबुङमा बनेको भगवती माविको नयाँ भवनको नेता अधिकारीले उद्घाटन गरेको हो । अधिकारीले २०३१ सालदेखि २०३८ सालसम्म उक्त विद्यालयमा आफ्नो आधारभूत तहको अध्ययन पुरा गरेका थिए ।
२०७२ साल बैशाख १२ गतेको भूकम्पबाट क्षतिग्रस्त भगवती माविको भवन जापान सरकारको ऋण सहयोगमा राष्टिय पुनः निर्माण प्राधिकरण केन्द्रीय आयोजना कार्यान्वयन इकाइ (शिक्षा) मार्फत निर्माण भएको हो ।
नव निर्मित भवनमा सभाहल, विज्ञान प्रयोगशाला, पुस्तकालय र आवश्यक फर्निचरहरु राखिएका छन् । विद्यालयको ६४ औं वार्षिकोत्सवको अवसर पारेर भवनको उद्घाटन गरिएको थियो ।
विद्यालय व्यवस्थापन समितिका अध्यक्ष छविलाल जोशीको सभापतित्वमा भएको कार्यक्रममा गण्डकी गाउँपालिका उपाध्यक्ष ललिता अधिकारी, कार्यकारी अधिकृत राकेश गुरुङ, नेकपाका नेता दिपक तिमिल्सिना, नेपाली काँग्रेसका रत्नमान श्रेष्ठ, विद्यार्थी विमला अधिकारी, भूपू शिक्षक शिव यादव, शिक्षक चन्द्र थापा, भूपू अध्यक्ष धन बहादुर थापा, विद्यालयका प्रधानाध्यापक दिपेन्द्र घिमिरे लगायतले शुभ कामना मन्तव्य राखेका थिए ।
कार्यक्रममा विद्यालयलाई सहयोग गर्ने चन्दादाता, उत्कृष्ट नतिजा हासिल गर्ने विद्यार्थीहरुलाई सम्मान तथा पुरस्कृत गरिएको थियो ।
