गोरखा समाचारदाता
गोरखा – गोरखा क्षेत्र नम्बर १ का प्रतिनिधि सभाका सांसद हरिराज अधिकारीले तत्काल मुआब्जा निर्धारण नभए राजिनामा दिने बताएका छन् ।
बुढीगण्डकी जलविद्युत आयोजना बाट प्रभावित आरुघाट लगायतका बजार क्षेत्रको मुआब्जा तत्काल निर्धारण नगरे राजीनामा दिएर जनता समक्ष जाने चेतावनी दिएका छन ।
उर्जा मन्त्रालयमा भएको छलफलमा उनले जनता समक्ष गरेको बाँचा पूरा गर्न नसकेकाले (पदमा बस्न) नैतिक समस्या परेको भन्दै राजिनामा दिने चेतावनी दिएका हुन् ।
‘नैतिक रुपले पनि के भनेर बस्ने त ? ४ वर्ष भइसक्यो, एक नम्बर क्षेत्रको अधिकांश भाग बुढीगण्डकी डुवान क्षेत्रले ओगटेको छ, जनताको जग्गा रोक्का भएको छ, बैंकमा ऋण छ, जन प्रतिनिधिको हैसियतले कसरी बस्ने ?’ सांसद अधिकारीले भने ।
आफूहरुले बुढीगण्डकी आयोजना बनाउने र स्थानीयलाई चित्त बुझ्दो मुआब्जा र पुर्नबास गराउने बाचा गरेर मतपाएको तर आफ्नै पार्टीको सरकारले माग सुनवाई नगरेको उनको गुनासो थियो ।
बुढीगण्डकी जल विद्युत आयोजनाको डुवान क्षेत्र भित्रको स्थानीय बजार गोरखाको आरुघाट र आर्खेत, धादिङको विशालनगर र खहरेको बाहेक अन्यको मुआब्जा वितरण भइसकेको छ ।
छलफलमा धादिङका पुर्व मन्त्री गंगालाल तुलाधर, कांग्रेसका नेता चीनकाजी श्रेष्ठ, सांसद हरि अधिकारी, प्रदेश सांसद रामकुमार अधिकारी, प्रतिनिधीसभाका सदस्य भुमि त्रिपाठी र पुर्व सांसद गुरु बुर्लाकोटी सहभागी थिए ।