- मंसिरको पहिलो साता हुने मस्र्याङ्दी महोत्सवमा महसिकारीले छंगाछुरमा डोरीमा झुन्डिएर भीरमह झिक्ने
लमजुङ — अग्ला र अप्ठ्यारा भीरमा जंगली मौरीले बनाउने घार हेर्दै कहालीलाग्दा ठाउँमा हुन्छन् । परम्परादेखि जोखिम मोलेर भीरमौरीको मह झिक्ने चलन अझै छँदैछ ।
चलचित्र र सञ्चारमाध्यममा तस्बिर देखेकाहरूले अब भीरमह झिकेको प्रत्यक्ष हेर्न मन भए मस्र्याङ्दी महोत्सव पुगे हुने भएको छ ।
मंसिर पहिलो साता हुने महोत्सवका बेला महसिकारीहरूले छंगाछुरमा डोरीमा झुन्डिएर भीरमह झिक्ने भएका छन् । महोत्सव अवलोकनका लागि आउनेलाई देखाउन यस्तो समय पारिएको हो । पर्यटक र पाहुनाले चार दिने महोत्सव अवधिभर होमस्टेमा बास पाउनेछन् ।
स्थानीय तह गठनपछि जिल्लामा मस्र्याङ्दी गाउँपालिकाले पहिलोपटक महोत्सवको आयोजना गर्न लागेको हो । मंसिर ३ देखि प्रथम मस्र्याङ्दी महोत्सव हुने भएको छ । पर्यटकले मंसिर ४ मा मस्र्याङ्दी गाउँपालिकाको घनपोखरा भीरमा हुने भीरमहको सिकार हेर्न पाउने महोत्सव आयोजकले बुधबार बेंसीसहरमा पत्रकार भेटघाट गरी जनाएका हुन् । महोत्सव संयोजक एवं गाउँपालिका अध्यक्ष अर्जुन गुरुङले आन्तरिक तथा बाह्य पर्यटकलाई साँझ बास बस्न होमस्टे गाउँ लगिने बताए ।
चक्रीय अन्नपूर्ण पदमार्गमा पर्ने मस्र्याङ्दी २ खुदीस्थित अमर माविको प्रांगणमा महोत्सव हुने भएको छ । ‘सिंगो गाउँपालिकाभित्र ८ वटा गाउँमा होमस्टे सञ्चालनमा आइसकेको छ । अब ५ गाउँमा तयारी छ,’ उनले भने, ‘हामी पर्यटक पाहुनालाई बजारमा होइन, गाउँमा बसेर गाउँकै अर्गानिक चखाउन चाहन्छौं ।’ मस्र्याङ्दी गाउँपालिकाको घनपोखरा, सिउरुङ, ढगैं, भुष्मे, मिप्रा र छापालगायत गाउँमा होमस्टे सञ्चालन गरिएको छ । होमस्टे पदयात्रा मार्गबाट पुग्न सकिन्छ । मोटरमा जानेका लागि पनि सडकको अवस्था सुधार गरिएको उनले बताए ।
हरिबोधनी ठूलो एकादशी पर्वको अवसर पारेर गरिन लागेको महोत्सवलाई सफल बनाउन अध्यक्ष गुरुङको संयोजकत्वमा १ सय २५ सदस्यीय मूल समारोह समिति गठन गरिएको छ । १५ सदस्यीय सचिवालय र १० वटा उपसमिति समेत गठन गरिएको आयोजकले जनाएका छन् ।
महोत्सवमा धार्मिक मेला, छेलो प्रतियोगिता, कृषि तथा स्थानीय उत्पादन प्रदर्शनी, स्थानीय कला संस्कृतिको प्रदर्शन, होमस्टेसहितका विभिन्न पर्यटकीय स्थानको भ्रमण, आर्गानिक खाना, मनोरञ्जनात्मक कार्यत्रक्रम, भलिबल, मिनी म्याराथुन दौड, माविस्तरीय नृत्य प्रदर्शनी र वडास्तरीय दोहोरी गीत प्रतियोगितालगायत आयोजना गरिने महोत्सव प्रचार उपसमितिका संयोजक रहेका गाउँपालिका उपाध्यक्ष होमबहादुर विकले बताए ।
महोत्सवमा ३० वटा स्टल राखिने भएका छन् । २० हजार दर्शकले अवलोकन गर्ने अपेक्षा आयोजकको छ । १ करोडको आर्थिक कारोबार हुने दाबी गरिएको महोत्सव सञ्चालनका लागि १६ लाख रुपैयाँ खर्च हुने आयोजकले जनाएका छन् ।
kantipur
