असोज ७- दुर्लभ बन्यजन्तुको सूचीमा रहेको पाटेबाघको संख्या नेपालमा ह्वात्तै बढेको निकुञ्ज तथा वन्यजन्तु विभागले बताएको छ ।सन् २०१७ मा गरिएको बाघ अनुगमनको नतिजा विभागले निकुञ्ज मार्फत सार्वजनिक गर्दै नेपालमा पाटेबाघको संख्या बृद्धि भएको जानकारी दिएको हो । आहारा, प्रजाती लगायत व्यवस्थित वासस्थानका कारण बाघको संख्या बृद्धि भएको विभागको तर्क छ ।
बर्दिया राष्ट्रिय निकुञ्जले सार्वजनिक गरेको सन् २०१७ को बाघ अनुगमनको नतिजा अनुसार नेपालमा २ सय ३५ वटा वयस्क पाटेबाघ छन् । जस अनुसार औसतमा चितवनमा ९३, बर्दियामा ८७, बाँकेमा २१, पर्सामा १८ र शुक्लाफाँटा निकुञ्जमा १६ वटा पाटेबाघ छन् ।
सन् २०१३ को बाघ सर्वेक्षण अनुसार चितवनमा १२०, बर्दियामा ५०, शुक्लामा १७, पर्सामा ७ र बाँके राष्ट्रिय निकुञ्जमा ४ वटा गरी नेपालमा १९८ वटा पाटेबाघ थिए । सन् २०१६ को बाघ अनुगमनका क्रममा बर्दियामा ५६ वटा वयस्क र २९ वटा वच्चा गरी ८५ वटा पाटेबाघ भेटिएका थिए ।
सन् २०१७ को बाघ अनुगमनबाट ६२ वटा वयस्क पाटेबाघ बर्दियामा भेटिएका हुन् । ५ वर्षअघि नेपालमा रहेको बाघको संख्यामध्ये ३७ वटा वयस्क पाटे बाघ नयाँ देखिएका हुन् ।
बर्दिया-बाँके कम्प्लेक्समा १६ डिसेम्बर २०१७ देखि दुई महिनासम्म स्वचालित क्यामरा मार्फत बाघ अनुगमन गरिएको बर्दिया राष्ट्रिय निकुञ्जका सहायक संरक्षण अधिकृत अशोक भण्डारीले बताए ।
कम्प्लेक्सलाई तीन वटा ब्लकमा विभाजन गरी बाँके—बर्दियामा क्यामेरा जडान गरिएको हो । जसअन्र्तगत करिव ७ सय २८ ग्रीड मध्ये ६ सय २४ ग्रीडमा क्यामेरा जडान थिए । निर्धारित ग्रिडमा २ सय जोडी अटोमेटिक क्यामरा जडान गरिएको हो । अनुगमनका क्रममा २ सय २७ जना प्राविधिक खटिएको बताइएको छ।
