हजुरको देशमा हजुरकै मर्जी,
म त हजुर दुई दिनको पाहुना ।
शैलेन्द्र थापा
उठान गर्न खोजिएको कुरा २०६८ साल तिरको हो । आफ्नो पहिलो सोलो एल्वम् ‘पन्छी’का लागि उनी यहि शब्दरचनामा गीत गाउने (स्वर भर्ने) तयारीमा थिए । उनले यस किसिमको गीत गाउने कुरा थाहा पाएपछि आमाको मनमा केही चिसो पस्यो । यस्ता–यस्ता शब्दका गीतहरु नगाए हुन्थ्यो भन्ने आमालाई लागेछ क्यारे । ‘बावु यो गीत नगाउ’, छोराप्रति असन्तुष्टि जनाउँदै आमाले भन्नुभएछ–‘भो पर्दैन यस्तो गीत गाउँन ।’ तर, उसले आमालाई सम्झाउँदै भन्यो–‘आमा आखिर गीत त हो नि, केही फरक पर्दैन ।’ केहीसीप नलागेपछि आखिर आमा चित्त बुझाउन बाध्य हुनुभयो । दैवको लीला टारेर टर्दैन कसैगरि भनेझैँ आखिर, २०७२ सालमा भयो त्यस्तै । माथि उद्धरण गरिएका गीतका शब्दहरुले व्यक्त गर्न खोजेका सन्देशसँग उनको जीवनले मेल खान गयो । र, केवल उनी अहिले मानव रुपी भौतिक शरिरविहिन अवस्थामा हामीमाझ सम्झनाका यस्तै अमिट उपहार छोडेर यस घर्तीमा विलिन भएका छन् ।
उनै मिठो स्वरका धनी सशस्त्र प्रहरी निरीक्षक दुर्गाबावु पाठकको २०७२ चैत्र २८ गते चितवनबाट काठमाडौं आउने क्रममा धादिङको मलेखुस्थित पृथ्वी राजमार्गमा भएको अकल्पनिय सडक दुर्घटनामा परि निधन भयो । साष्ट्रसेवाको अलवा लामो समयदेखि संगीतको क्षेत्रमा, विशेष गरि आधुनिक संगीततर्फ आफ्नो नाम चम्काउँदै गरेका स्व.पाठक संगीतकार तथा रचनाकार समेत थिए । आफै गीत लेख्ने, संगीत भर्ने र त्यसलाइ मिठो स्वर दिने क्षमता राख्दथे उनी ।
माथि उल्लेखित गीतको अर्को हरफका शब्दमा उनले गाएका थिए,
मरेर गए इश्वरको वरदान,
वाचुन्जेल नहोस केही कमी ।
आजको मिलन भोलिको विछोट,
सम्झना रहिरहोस् नौ जुनी ।।
यी शब्द वास्तवमै उनको जीवनसँगै मेल खान गए । चितवनको शिवनगरमा २०४१ सालमा जन्मिएका स्व.पाठक २०६४ साल असार ६ गते सशस्त्र प्रहरी बलको सशस्त्र प्रहरी निरीक्षक पदमा खुल्ला प्रतिस्पर्धाबाट प्रबेश गरेका थिए । सानै उमेरदेखि गीत संगीतमा रम्न चाहने उनी २०६०÷०६१ सालमा चितवनमा सम्पन्न सिनर्जी राईजिङ्ग स्टार प्रतियोगितामा उत्कृष्ट दशभित्र समेत पर्न सफल भएका थिए । यस्तै चितवनमै सम्पन्न आठौं कालिका म्युजिक अवार्डमा वेष्ट आर्टिष्टको उपाधी समेत हात पार्न सफल भएका थिए ।
आधुनिक संगीततर्फ विशेष रुचि राख्ने स्व.पाठक प्राय सबै प्रकारका गीत गाउने दक्षता राख्दथे । उनका यसअघि पनि ‘पन्छी’ र ‘निन्द्रा लाग्दैन’ जस्ता दुइवटा एल्वम् बजारमा आइसकेका छन् । यस एलबम्मा अहिलेकी चर्चित गायिका अन्जु पन्तसँग सयुंक्त रुपमा उनले उनस्वर दिएका थिएभने म्यूजिक भिडियोमा समेत चर्चित नायिका केकी अधिकारी तथा निता ढुंगानाका साथ उनलाई देख्न सकिन्छ । उनले गाएका हजुरको देशमा, पलपल तिम्रो यादले, निद्रा लाग्दैन आदि गीतहरुका म्यूजिक भिडियो यू–ट्युबमा समेत हेर्न सकिन्छ ।
२०६४ सालबाट सशस्त्र प्रहरी अधिकृत बनेका उनी आफ्ना साथीभाईसाझ समेत उत्तीकै लोकिप्रिय मानिन्थे । कडा प्रकृतिका तालिममा पनि आफ्नो दुःख र थकानका बाबजुत थकित साथीहरुलाई मिठो गीत गाएर उर्जा थप्ने कार्यमा उनी कहिल्यै पछि परेनन् । संगठनमा समेत अत्यन्तै अनुशासित, कर्तव्यनिष्ठ, पेशागत रुपमा दक्ष र जिम्मेवार अधिकृतका रुपमा गनिन्थे उनी । संगठनमा राम्रो भविष्य बोकेका स्व. दुर्गाबाबु पाठक सहयोगी एवं सहहृदयी अधिकृतका रुपमा परिचित थिए । फुटबल र क्रिकेट खेलका समेत अब्बल खेलाडी उनी क्यारीकेचर गर्न, गीतार बनाउन तथा अन्य विभिन्न क्रियाकलापमा समेत अब्बल मानिन्थे । बहुप्रतिभाका धनी स्व.पाठकले पंक्षी एल्वम्मा दिएको सुमधुर स्वर जस्तै आफ्ना साथीभाईमाझ पनि मिठो सम्झना छोडेर गएका छन् ।
स्वर्गिय पाठककी आमा आज पनि त्यही गीत सम्झदै भन्नुहुन्छ–‘मैले त्यो गीत नगाउ भनेको मान्दै मानेन, आखिर यस्तो हुन लेखेको रहेछ ।’ जे नहुनु थियो त्यो भइनैसक्यो । अब हामीले जति नै बिलौना गरेपनि उनको भौतिक उपस्थिति पाउन सक्दैनौं । भोलिका दिनमा उनका सांगितिक कृर्तिहरुलाई जर्गेना गर्दै उनले अगुवाई गरेको पथमा सिर्जनशिल भएर लागेको खण्डमा स्व. पाठकको आत्माले चिरशान्ति पाउने अपेक्षा गर्न सकिन्छ ।
लेखक सशस्त्र प्रहरी निरीक्षक हुन्
