नेकपा (एमाले)ले निर्वाचन हुन नदिनेहरुले सप्तरी घटना घटाएको भन्दै यसको जिम्मेवारी मधेशी मोर्चाले लिनु पर्ने बताएको छ ।

एमाले केन्द्रीय कार्यालय धुम्बाराहीमा २४ फागुनमा पत्रकार सम्मेलनको आयोजना गरी उक्त दलले सप्तरी घटनाको जिम्मेवारी मोर्चाले लिनु पर्ने बताएका हो । पत्रकार सम्मेलनमा बोल्दै एमाले महासचिव ईश्वर पोखरेलले भने, “सप्तरी घटनाको जिम्मेवारी मधेशी मोर्चाले लिनुपर्छ ।”

मोर्चाका कार्यकर्ताहरुले ५० भन्दा बढी बम पड्एको र ४५ जना प्रहरी घाइते भएपछि मात्रै गोली चलेको उनले बताए ।

घटनाको सरकार र राष्ट्रिय मानवअधिकार आयोगले छानविन गर्नु पर्ने एमालेले माग गरेको छ । पत्रकार सम्मेलनमा बोल्दै महासचिव पोखरेलले सप्तरीका प्रमुख जिल्ला अधिकारी र सुरक्षा निकायका प्रमुखलाई फिर्ता बोलाउनुले शंका उब्जाएको बताए ।

पत्रकार सम्मेलनमा बोल्दै एमाले उपाध्यक्ष भीम रावलले एमालेको मेची महाकाली अभियानलाई निरन्तरता दिइने बताए । २७ फागुनदेखि मेची महाकाली अभियानले निरन्तरता पाउने बताउदै सहयोगका लागि सबैलाई आग्रह गरे ।

त्यस्तै एमाले संसदीय दलका उपनेता सुभाष नेम्वाङले सभामा ढुङ्गा र बम हानिएको बताए । यस घटनाको जिम्मेवारी सरकार र विशेष गरी गृहमन्त्रीले लिनुपर्ने उनको भनाई थियो ।

पत्रकार सम्मेलनमा बोल्दै एमाले नेता प्रदिप ज्ञवालीले अब मधेशी मोर्चाले हिंसामा नउत्रिने घोषणा गर्नु पर्ने बताए । पुरानै कार्यक्रम अनुसार अभियानलाई अगाडी बढाइने उनले बताए ।