नवीन लामिछाने/बेसीसहर, लमजुङ
फागुन २० गते । नेपाली काँग्रेसका वरिष्ठ नेता रामचन्द्र पौडेलले कुनैपनि बहानामा स्थानीय तहको निर्वाचन नरोकीने बताउनु भएको छ ।
नेपाल शिक्षक संघ लमजुङको आठौँ जिल्ला अधिवेशनलाई सम्वोधन गर्न लमजुङ पुग्नुभएका पौडेलले बिहीबार यस्तो बताउनुभएको हो । लामो समय सम्म निर्वाचन नहुँदा अस्तिरता बढेको भन्दै नेता पौडेलले आगमी माघ ८ भित्रमा तीन वटा स्थानीय निकायको निर्वाच गर्नुृपर्ने बाध्यकारी व्यवस्था भएकाले निर्वाचनको लागि आलटाल अस्वीकार्य भएको बताउनुभयो ।
मधेशवादी दल र एमालेलाई समेत निर्वाचनमा आउने वातावरण बनाउन काँग्रेस लागि परेको भन्दै नेता पौडेलले केही परिमार्जन सहित संविधान संशोधन गरेरै भएपनि निर्वाचनमा जानुको विकल्प नभएको नेता पौडेलको भनाई थियो ।
जसरी पनि वैशाख अन्तिममा स्थानीय निकायको निर्वाचन हुने भएकाले आपसी फुटमा नलागी एक भएर निर्वाचनमा जान कार्यकर्तालाई निर्देशन दिँदै नेता पौडेलले देशमा काँग्रेसको विचार विजयी हुने भएपनि निर्वाचनमा काँग्रेस पराजित हुनु आश्चर्य भएको धारणा राख्नुभयो ।