घैंटे मारिएपछि भारत भागेका समिरमानले बाफलबाटै ३० लाख फिरौती उठाए
१९ फागुन, काठमाडौं । पुसको पहिलो साता युवा संघ रुपन्देहीका अध्यक्ष दुर्गा तिवारीको हत्या भयो । हत्याको मख्य योजनाकार मनोज पुन भएको भन्दै प्रहरीले दुई महिनापछि यसै साता ८ जनालाई पक्राउ गरेर सार्वजनिक गरेको छ । तर, तिवारीको हत्यामा काठमाडौंका डन पनि संलग्न भएको प्रहरीकै अनुसन्धानबाट देखिएको छ ।
तिवारी हत्याकाण्डमा काठमाडौंको वाफललाई आधार इलाका बनाएर गुण्डागर्दी गर्दै आएका समिरमान बस्नेतको पनि संलग्नता रहेको प्रहरी अनुसन्धानबाट खुलेको हो । तर, प्रहरीले यो विषय सार्वजनिक गरेको छैन । बस्नेतको नाम सार्वजनिक नगरिनु रहस्यमय छ ।
तिवारी हत्या काण्डपछि स्थानिय प्रहरीसँगै काठमाडौंबाट विशेष टोली अनुसन्धानका लागि खटिएको थियो । संयुक्त टोलीले ८ जनालाई पक्राउ गरेर सार्वजनिक गरे पनि घटनामा समिरमान वस्नेतको संलग्नता खुलाइएको छैन ।
तर, प्रहरी स्रोतका अनुसार समिरमान वस्नेत र मनोज पुनले संयुक्त योजना बनाएर तिवारीको हत्या गराएको भेटिएको हो ।
फरार सूचीमा बस्नेत
युवा संघका दुर्गा तिवारीको हत्या प्रयास एक वर्षअघि पनि भएको थियो । त्यो बेलादेखि नै मनोज र समिरमानको कनेक्सन देखिएको छ । प्रहरी स्रोतका अनुसार मनोज र समिरमान भारतमासँगै बस्दै आएका छन् ।
दुर्गा तिवारीमाथि ७२ साल असोज ११ गते भएको हत्या प्रयासमा समिर वस्नेतको स्पष्ट संलग्नता देखिएको थियो । त्यति बेलाको घटनामा समिरमान बस्नेत प्रहरीको फरार सूचीमा छन् । सो घटनामा प्रहरीले तत्काल ७ जनालाई पक्राउ गरेको थियो ।
७ जना पक्राउ परे पनि त्यति बेलाको घटनाको नतृत्व गरेका सालिकराम चापागाइँ भने फरार थिए । उनी तिवारीमाथि आक्रमणको प्रयास गरेर भारतको गोवा पुगेका थिए । करिब डेढ महिना भारतबाट लुकेर काठमाडौं आइपुगेका चापागाउँ सुन्धाराबाट पक्राउ परे ।
उनै चापागाइँले अघिल्लो वर्ष तिवारीको हत्याको योजना भारतमा बसेका मनोज पुन उनका विश्वासिलो पात्र सोम आले र समिरमान बस्नेतले बनाएको बयान प्रहरीलाई दिएपछि बस्नेतको कनेक्सन खुलेको हो ।
२०७२ सालको घटनामा संलग्न रहेको आरोपमा चापागाइँसहित त्यति बेला पक्राउ परेका ८ जना विरुद्ध प्रहरीले हाहतियार, लागुऔषध, ज्यान मार्ने उद्योगमा मुद्दा चलायो । त्यही केशमा समिरमान बस्नेत समेत प्रहरीको फरार सूचीमा छन् ।
प्रहरी स्रोत भन्छ, ‘२०७२ सालको घटनामा समिर बस्नेतको संलग्नता खुलेपछि प्रहरीले अरु ८ सहित बस्नेतलाई पनि त्यही मुद्दामा फरार सूचीमा राखेको छ । उतिबेलै मनोज पुनसँग योजना बनाउन सामेल भएका बस्नेत अहिले पुनसँगै लुकिरहेको हामीलाई सूचना छ ।’
घैंटे मारिएपछि भयो भेट
२०७२ साल भदौ २ गते काठमाडौंको गल्कोपाखामा कुमार घैंटे ‘प्रहरी इन्काउन्टर’मा मारिए । घैंटेकै समूहमा रहेका समिरमान बस्नेत घैंटे मारिए लगत्तै भागेर भारतको गोवा पुगे । त्यहीँ मनोज पुनसँग बस्नेतको भेट भएको प्रहरी स्रोतले जनाएको छ ।
गुण्डागर्दीको दुनियामा प्रहरी इन्काउन्टरमै मारिएका दिनेश अधिकारी चरी एकातिर समिर र कुमार घैंटे अर्कोतिर थिए । चरीपछि घैंटे पनि प्रहरी इन्काउण्टरमा मारिएपछि समिर बस्नेतमाथि प्रहरीले निगरानी बढायो । त्यसपछि उनी काठमाडौंमा टिक्न नसकेर भारत छिरे ।
तिवारी हत्याकाण्डको अनुसन्धानमा संलग्न अधिकृतका अनुसार मनोज पुनसँग भेटेपछि समिर बस्नेतले काठमाडौंका उनको ग्याङका केही सदस्यलाई उतै बोलाएको पनि देखिएको थियो । घैंटे मारिएपछि उनीहरु काठमाडौं आउन सक्ने अवस्था देखिएन । त्यसैले समिर र मनोज पुनको उतै केनक्सन सुरु भएको देखिन्छ ।
तिवारीको हत्यापछि पनि ३० लाख फिरौती
अपराधिक गिरोहले मागेको फिरौती रकम नदिनु नै तिवारी हत्या काण्डको मुख्य कारण भएको प्रहरीको अनुसन्धानले देखाइसकेको छ । आर्थिक लेनदेनका कारण दुर्गा तिवारीको हत्या भएको देखिन्छ । तिवारीको हत्यापछि पनि मनोज पुन र समिरमान वस्नेतले विभिन्न व्यापारीबाट ३० लाख फिरौती उठाएको प्रहरी अनुसन्धानबाट देखिएको छ ।
प्रहरी स्रोतका अनुसार मनी एक्सचेन्जमार्फत बुटवलबाट काठमाडौं र काठमाडौंबाट दुवई पठाएर फिरौती असुल भएको देखिएको छ । यो प्रकरणमा काठमाडौंको बाफलमा समिर बस्नेतको इलाकाकै मनि एक्सचेन्ज प्रयोग भएको देखिएको छ ।
तिवारीको हत्या गर्नुअघि यही समूहले काठमाडौंका केही व्यवसायीलाई समेत टार्गेटमा पारेको प्रहरीले सूचना पाएको छ । तर फिरौती बुझाउने, धम्की पाउने कोही पनि प्रहरीको समक्ष जान मानिरहेका छैनन् ।
पुनको कनेक्सन छोटा राजनसँग ?
तिवारी हत्या काण्डको अनुसन्धानपछि प्रहरीले मनोज पुन ‘अहिले सम्मकै खरतनाक’ अपराधी भएको निष्कर्ष निकालेको छ । तिवारीको हत्या गराउन प्रयोग भएका समूहलाई समेत एक अर्कासँग परिचय नगराउने पुनको शैली अन्डरवल्र्ड डनको शैली भएको प्रहरी अधिकृतहरुको बुझाइ छ ।
एक अनुसन्धान अधिकृतले भने, ‘तिवारीको हत्या भएको दिन प्रयोग भएको मोटरसाइकल चलाउने र मोटरसाइकलको पछाडि बसेर गोली हान्नेले समेत एक अर्कालाई चिन्दैन थिए । दुवैलाई एक अर्कासँग सम्पर्क नगर्न पुनले निर्देशन दिए । मान्छे मारेपछि उसैले फोन गरेर जिम्मा लिएका छन् । यो अन्डरवल्र्डहरुले गर्ने स्टाइल हो ।’
पुन र समिर बस्नेतलाई खोज्न भारत पुगेका प्रहरी टोलीलले पुनले भारतीय अन्डरवल्र्ड डन छोटा राजन समूहसँग सम्बन्ध बढाएको हुन सक्ने अशंका गरेको छ । गोवामा लुकेर बसिरहेका पुन प्रहरीको निगरानीमा रहेका सूचना पाए लगतै दिल्ली पुगेका थिए ।
प्रहरी स्रोतका अनुसार इन्टरनेट नम्बरबाट फोन गरेर फिरौती असुल गर्ने शैली अपनाएका मनोज पुनले छोटा राजन समुहका सदस्यसँग सम्बन्ध बढाएकै कारण सबै धन्दा चलाइरहेको प्रहरीको दाबी छ ।
onlinekhabar
