फाल्गुन १२, २०७३- एमाले अध्यक्ष एवं पूर्व प्रधानमन्त्री केपी ओलीले सैद्धान्तिक हिसाबले संविधान संशोधनको प्रस्ताव संसदमा छलफलमा लगेपनि कुनै हालतमा पारित हुन नदिने बताएका छन् । सरकारले ल्याएको संशोधनको प्रस्ताव राष्ट्र हित विपरित भएकाले कुनै हालतमा पारित हुन नदिने बिहीबार सिन्धुलीमाढीमा आयोजित एमाले प्रथम जिल्ला प्रतिनिधी परिषदको उद्घाटन गर्दै ओलीले ठोकुवा गरे । देशको हित विपरित, हानिकारक, निर्वाचन बिथोल्ने अर्को प्रयास हुने भएकाल संशोधन प्रस्ताव पास हुँदैन ।

एमालेको दवावमा सरकारले चुनाव घोषणा गर्न बाध्य भएकाले त्यसलाई बिथोल्नका संविधान संशोधनको नाटक रचिएको अध्यक्ष ओलीको भनाइ थियो । चुनाव तोकिएकै मितिमा हुने र त्यसलाई कुनै शक्तिले रोक्न नसक्ने अध्यक्ष ओलिले बताए । ‘स्थानीय तहको निर्वाचन तोकिएको छ, आगामी कात्तिक, मंसिर संघीय प्रदेशको चुनाव पनि हुन्छ,’ उनले भने । तर संसदको निर्वाचनका बारे भने उनले कहिले हुन्छ भन्ने उनले खुलाएनन् ।

एमाले र ओलीलाई मधेस प्रवेशमा रोक लगाउने हल्ला चलाएको प्रति कटाक्ष गर्दै उनले तराईमा यथार्थ कुरा लिएर जान कसैले रोक्न नसक्ने बताए । आफ्नो सरकारका पालामा मधेसको विकासका लागि विनियोजन गरिएको रकमले एमाले मधेस विरोधी हो या होइन भन्ने बुझ्नुपर्ने उनको तर्क थियो । अन्य दलका नेताहरु विदेशी इशारामा चल्ने गरेको अध्यक्ष ओलीले आरोप लगाए ।