माघ २१, २०७३- विश्वविद्यालयमा भएको तालाबन्दी लम्बिएर १३ दिनदेखि पढाइ हुन नसकेपछि काठमाडौं विश्वविद्यालयका विद्यार्थीले खुल्ला चौरमा नै पढाइ गरेका छन् । विश्वविद्यालय प्रशासनलाई दबाब दिन विद्यार्थीले विश्वविद्यालय बाहिरै १ घण्टा कक्षा सञ्चालन गरेको विद्यार्थी रुपक पराजुलीले बताए । ‘१३ दिनदेखि पढाइ हुन नसकेकोले दबाबको लागि स्वतस्फूर्त रुपमा कक्षा सञ्चालन गरेका हौँ,’ बायो टेक्निकल चौथो वर्षमा अध्ययनरत दिव्यदर्शी नेपालले भने, ‘नियमित कक्षामा असर पुग्नु भएन ।’

उपस्थित स्कुल अफ इञ्जिनियरिङ र स्कुल अफ साइन्सका करिब १ सय विद्यार्थीले सांकेतिक विरोधस्वरुप १ घण्टा अध्ययन गरेका थिए ।

विद्यार्थी संगठनको तालाबन्दीका कारण काठमाडौं विश्वविद्यालय (केयू)मा १३ दिनदेखि पठनपाठन भएको छैन । उपकुलपति रामकण्ठ माकजू समेतले विद्यार्थी संगठनका प्रतिनिधिहरुसँग वार्ता गरे पनि निकास भने निस्केको छैन । रजिष्ट्रार भोला थापाले स्थगित विद्यार्थी कल्याण परिषद्‍को निर्वाचन कहिले र कसरी गर्ने भन्नेबारे सहमति नहुँदा कक्षा सञ्चालन हुन नसकेको स्वीकारे । ‘सहमतिको लागि प्रयास भइरहेको छ, सबै संगठनले आफ्नो आफ्नो धारणा राखिरहनुभएको छ,’ उनले भने, ‘अझै प्रयास गरिरहेका छौँ, छिट्टै निकास निस्केला ।’

स्थगित भएको विद्यार्थी कल्याण परिषद्को निर्वाचन तत्काल गराउन माग गर्दै नेकपा एमाले समर्थित अखिल नेपाल राष्ट्रिय स्वतन्त्र विद्यार्थी युनियन (अनेरास्वियु)ले माघ ९ गतेबाट केन्द्रीय विश्वविद्यालय र प्रशासनिक भवनमा तालाबन्दी गरेको थियो । अनेरास्वियुको विश्वविद्यालय राष्ट्रिय समितिका सचिव पुजन गौतमले निर्वाचन हुने प्रत्याभूति नभएसम्म तालाबन्दी जारी रहने बताए ।

नेकपा माओवादी केन्द्र निकट अखिल (क्रान्तिकारी)को दबाबमा उपकुलपति रामकण्ठ माकजू श्रेष्ठको निर्देशनमा चुनाव स्थगित गरिएको विरोधमा तालाबन्दी गरेको एमाले अखिलको आरोप छ । पुस ८ गते भएको विद्यार्थी कल्याण परिषद्‍को निर्वाचनमा विवाद भएपछि निर्वाचन स्थगित भएको थियो । ७६ कक्षा प्रतिनिधिमध्ये २ वटामा विवाद भएको थियो । माघ ५ गते नेपाल विद्यार्थी संघ, अनेरास्वियु, अखिल (क्रान्तिकारी) लगायतका संगठनबीच विवादित २ कक्षामा निर्वाचन गर्ने सहमति भएपछि निर्वाचन समिति संयोजक प्रा. दिपकप्रसाद सुवेदीले हस्ताक्षर गरेर माघ १० गते निर्वाचन गर्ने भन्दै सूचना समेत जारी गरेको थियो । तर, माघ ९ गते पुन: नियुक्त उपकुलपति माकजूलाई दबाब दिएर अखिल क्रान्तिकारीले निर्वाचन स्थगित गरेको अनेरास्वियुले आरोप लगाएको छ ।