लेबनानकाे जेनेरल सेक्युरिटी निर्देशनालयको सञ्चार कार्यालयले विज्ञप्ती जारी गर्दै पक्राऊबारे पुष्टि गरेको अल्मानर डटकम सहित विभिन्न सञ्चारमाध्यमले जनाएका छन् ।

पक्राऊ परेका नेपालीको जन्म सन् १९९१ र १९९३ रहेको विज्ञप्तीमा खुलाइएको छ । पक्राउ परेकाहरुले अनुसन्धानको क्रममा टर्की, जोर्डन, बेलायत र नेपालमा रहेको इजरायली दूताबासमा फोन सम्पर्क गरेको स्वीकारेको विज्ञप्तीमा भनिएको छ ।

पक्राउ परेका दुई नेपाली महिलाहरु नेपालबाट लेबनानमा घरेलु कामदार लैजान सक्रिय रहने गरेको र उनीहरुले त्यस्ता कामदारलाई इजरायली दूतावासको सम्पर्क दिएर लेबनानबारे जानकारीहरु दिन लगाउने गरेको विज्ञप्तीमा उल्लेख गरिएको छ ।

अनुसन्धानपछि उनीहरुलाई सम्बन्धित अदालतमा उपस्थित गराइएको र जासूसीमा संलग्न अन्यको खोजी भइरहेको विज्ञप्तीमा भनिएको छ ।

यसअघि मंसिरमा घरेलु कामदारको रुपमा  आएर ‘अधिकारकर्मीको भूमिका’ खेलेको भन्दै लेबनानले दुई नेपाली महिलालाई पक्राउ गरेको थियो ।