कपिलबस्तुः नेपाली कांग्रेसका केन्द्रीय सदस्य चन्द्र भण्डारीले पाँच नम्बर प्रदेशलाई टुक्र्याउन दिल्ली र बिहारले लगाएको गिद्दे आँखाको षड्यन्त्रमा प्रधानमन्त्री पुष्पकमल दाहाल प्रचण्ड र कांग्रेसका सभापति शेरबहादुर देउवा परेको आरोप लगाएका छन्।
पाँच नम्बर प्रदेश संघर्ष समितिले शुक्रबार कपिलबस्तुको बाँडगंगामा गरेको विरोध सभालाई सम्बोधन गर्दै भण्डारीले दिल्ली र बिहारको षड्यन्त्रमा फसेर प्रधानमन्त्री पुष्पकमल दाहाल प्रचण्ड र कांग्रेस सभापति देउवा लगायत नेताहरुले मिलेर पाँच नम्बर प्रदेश टुक्र्याउन गरी सरकारका तर्फबाट संविधान संशोधन प्रस्ताव संसदमा टेबुल गरिएको आरोप लगाएका हुन्।
उनले पाँच नम्बर प्रदेश टुक्र्याउने विषयमा कांग्रेसले कुनै निर्णय नलिएको भन्दै प्रदेश टुक्र्याइए आफूहरुलाई मान्य नहुने बताए। उनले पाँच नम्बर प्रदेश टुक्र्याउने गरी संविधान संशोधन प्रस्तावमाथि मतदान हुँदा पार्टीले लगाएको ह्विप पनि नमान्ने चेतावनी दिए। उनले पार्टीभन्दा ठूलो राष्ट्रियता नभएको भन्दै उनले पार्टीको ह्विपलाई नाघेर संशोधन प्रस्तावको विपक्षमा मतदान गर्ने चेतावनी पनि दिए।
उनले पाँच नम्बर प्रदेश टुक्र्याउने हो भने कांग्रेस सभापति शेरबहादुर देउवा र एमाले उपाध्यक्ष नेता रहेको कैलाली र कञ्चनपुर पनि सात नम्बर प्रदेशबाट छुट्टाउनु पर्ने बताए। उनले भने,‘पाँच नम्बर प्रदेशबाट पहाडी जिल्लाहरुलाई छुट्याउने हो भने सुदूरपश्चिमको कैलाली र कञ्चनपुर तथा पूर्वका झापा, मोरङ र सुनसरी पनि पहाडी जिल्लाबाट छुट्याउनु पर्छ। होइन भने पाँच नम्बर प्रदेशबाट मात्रै किन पहाडी जिल्ला छुट्याउनु पर्यो?।’
उनले पूर्वका झापा, मोरङ र सुनसरी तथा सुदूरपश्चिमका कैलाली र कञ्चनपुरलाई पहाडी जिल्लाबाट छुट्याउने निर्णय भए आन्दोलनको दबाब १५ दिन पनि शीर्ष नेताहरुले थेग्न नसक्ने बताए।
कार्यक्रममा नेपाली कांग्रेस रोल्पाका सभापति एवं सांसद अम्मरसिंह पुनले पाँच नम्बर प्रदेश टुक्र्याउने निर्णय आफूहरुले नमान्ने बताए। उनले पाँच नम्बर टुक्र्याउने गरी संसदमा टेबुल भएको संशोधन प्रस्तावमा मत हाल्न पार्टीले ह्विप जारी गरेपनि विपक्षमा मतदान गर्ने बताए।
उनले मगरका नाममा प्रधानमन्त्रीले सोझा साझा मगरहरुलाई फकाउन ललिपप देखाएको आरोप समेत लगाए।
annapurnapost
