पूरा भयो बौद्ध पुनर्निर्माण (फोटो फिचर)

बुधबार, कार्तिक ०३, २०७३ मा प्रकाशित

‘मंसिर ३, ४ र ५ गते वैदिक विधिअनुसार पूजा गर्ने तयारी छ, मंसिर ७ गते राष्ट्रपति वा प्रधानमन्त्रीबाट उदघाटन गर्ने कार्यक्रम छ’
कार्तिक ३, २०७३- ०७२ वैशाख १२ मा गएको भूकम्पले भत्किएको बौद्ध स्तुपा पुनर्निर्माण सकिएको छ । करिव एक वर्षमा पुनर्निर्माण सकिएपछि औपचारिक उदघाटनको तयारी भएको छ ।

पुनर्निर्माणमा संलग्न इञ्जिनियर रुपक झाका अनुसार मंसिर पहिलो साता उदघाटन गरेर सर्वसाधारणका लागि खुला गर्ने तयारी भएको छ । ‘मंसिर ३, ४ र ५ गते वैदिक विधिअनुसार पूजा गर्ने तयारी छ,’ उनले भने, ‘मंसिर ७ गते राष्ट्रपति वा प्रधानमन्त्रीबाट उदघाटन गर्ने कार्यक्रम छ ।’
वैशाख १२ भूकम्पले क्षति भएपछि जेठ १९ देखि भत्काउन सुरु गरिएको थियो । गत वर्षको मंसिर दोस्रो सातादेखि पुनर्निर्माण थालिएको थियो ।

पुनर्निर्माणका लागि २० करोड खर्च भएको इञ्जिनियर झाले जानकारी दिए । उनका अनुसार स्तुपाको गजुरमा मात्रै ३० किलो सुन प्रयोग भएको छ ।
पुनर्निर्माणपछि बौद्ध स्तुपा भूकम्पप्रतिरोधी भएको बताइएको छ ।