आश्विन २१, २०७३- प्रधानमन्त्री पुष्पकमल दाहालले शुक्रबार भूकम्प प्रभावित लाप्राकको गुप्सीपाखा स्थित अस्थायी शिविरमा नमूना एकीकृत बस्तीको शिलान्यास गरेका छन् ।
गैर आवासिय नेपाली संघ (एनआरएन) ले पुनर्निर्माण गर्न लागेको बस्तीको उनले राजधानीबाट हेलिकप्टरमा आएर शिलान्यास गरि फर्केका हुन् । स्थानीय भूकम्प पीडितलाई सम्बोधन गर्दै दाहालले पुनर्निर्माणमा सरकारको तर्फबाट ढिलाई भएको स्विकार गर्दै अब काममा तीब्रता दिने बताएका थिए । ‘लाप्राकमा नमूना बस्ती बनाउने गुरुयोजना बनिसकेको छ,’ उनले भने, ‘हिउँद सुरु भएपछि काम सुरु हुन्छ ।’
प्रधानमन्त्रीले अस्थायी शिविरमा निर्माण हुने एउटा घरको समेत शिलान्यास गरेको सांसद छमबहादुर तमुले बताए । उनले गुरुयोजना समेत सार्वजनिक गरेका हुन् ।
मुख्य सचिव सोमलाल सुवेदी, संघका अध्यक्ष शेष घले सहित ३ वटा हेलिकप्टर लिएर दाहाल लाप्राक पुगेका हुन् । घलेले वर्षातमा काम सुरु गर्न नसकेकाले अब एक वर्ष भित्र घरहरु निर्माण गरेर पीडितलाई हस्तान्तरण गर्ने प्रतिवद्धता जनाए । लाप्राकका सम्पूर्ण घरहरु संघले पुनर्निर्माण गर्ने सम्झौता भइसकेको प्रमुख जिल्ला अधिकारी नारायण भट्टले बताए ।
गत बैशाख १२ गते राष्ट्रपति विद्यादेवी भण्डारीको उपस्थितिमा एकीकृत नमूना बस्ती निर्माण गर्ने सम्झौता लाप्राकमै भएको थियो । सम्झौता भएको ६ महिनापछि बस्तीको शिलान्यास भएको हो । बस्ती निर्माणका लागि वन क्षेत्रको १८.३ हेक्टर जग्गा पीडितहरुलाई उपलब्ध गराउने निर्णय सरकारले गरिसकेको छ ।
५ सय ९५ घरधुरीका लागि घर बनाउँदा अझै १ सय ५० रोपनी जग्गा अपुग हुने प्रजिअले बताए । ‘थप जग्गा खोजीको लागि प्रक्रिया सुरु भइसकेको छ,’ उनले भने । लाप्राकसम्म कच्ची सडक पुगेको छ ।
२०७५ साल भित्र बारपाकसम्मको सडक कालोपत्रे हुने ११ किलो छेवेटार, भालुस्वाँरा, बारपाक सडक आयोजनाले जनाएको छ । लाप्राक भूकम्पको केन्द्रबिन्दु बारपाकको छिमेकी गाविस हो । भूकम्पपछि बस्ती पहिरोको जोखिममा परेका कारण लाप्राकबासी अस्थायी शिविरमा बस्दै आएका छन् ।
ekantipur