सुदीप कैनी, गोरखा
ऐतिहासिक, पुरातात्विक र पर्यटकीयस्थल लिगलिगकोटमा आश्विन २१ गते ७ औं लिगलिगे दौड प्रतियोगिता हुने भएको छ । गोरखाको मर्स्याङ्दी र चेपे दोभानबाट सुरु हुने प्रतियोतिमा पहिलो हुनेले श्रीपेच र नगद ५० हजार ५ सय ५ रुपैंया पुरस्कार जित्ने छन् ।
विगत वर्षहरुमा झैँ लिगलिग कोट विकास अभियानले सातौं प्रतियोगिताको आयोजना गर्ने भएको हो । नेपाल एकीककरण अघिको बाईसे चौविसे साना राज्यहरु मध्ये लिगलिग कोट राज्यमा दौडेर प्रथम हुने व्यक्ति राजा हुने परम्परा थियो । पहिले दौड जुन अभिप्रायबाट सुरु भएको भएपनि अहिले आन्तरिक तथा बाह्रय पर्यटकलाई लिगलिगकोट ल्याउन प्रतियोगिता आयोजना गरिएको अभियानका अध्यक्ष पूर्णबहादुर रानाले जानकारी दिए ।
वि.सं. १६०४ मा सुरु भएको दौडलाई पछिल्लो समय २०६७ बाट पुन: निरन्तरता दिन थालिएको हो । राजा द्रव्य शाहको उदय पछि तत्कालिन समयमा दौडको अन्त्य भएको थियो । पहिलो लिगलिगे दौडमा दलसुर घले मगर बिजयी भई राजा भएको जनविश्वास छ ।
लिगलिग कोट पालुङटार नगरपालिका स्थित आँपपिपलमा पर्छ । ‘राजा छान्ने दौडको सम्झनामा श्रीपेच पुरस्कार राखिएको हो’, उनले भने । दोस्रो हुनेलाई नगद ३० हजार तीन सय पाँच, तेस्रो हुनेलाई नगद २० हजार दुई सय पाँच रुपैँयाको साथमा प्रमाणपत्र र मेडल पुरस्कार दिने आयोजकले जनाएको छ ।
त्यस्तै समावेशीतर्फ महिला र लिगलिगवासीको लागि प्रथम हुनेलाई नगद १५ हजार पाँच, दोस्रो हुनेलाई १० हजार पाँच, तृतीय हुनेलाई पाँच हजार पाँच रुपैँया पुरस्कार दिइने आयोजकले जनाएको छ । प्रतियोगीता सम्पन्न गर्न १४ लाख ४१ हजार खर्च लाग्ने अनुमान गरिएको छ ।
ekantipur