किरण लोहनी/उज्यालो
गोरखा, भदौ २९ – पुनर्निर्माणका लागि गोरखामा खटिएका प्राविधिकहरुले काम बन्द गरेका छन् । ब्यक्तिगत आवास निर्माणका लागि प्राविधिक ज्ञान दिने गरि सरकारले खटाएका इन्जिनियर, सव इन्जिनियर र असिस्टेन्ट सव इन्जिनियरहरुले काम गर्न नसक्ने बताएका छन् ।
पुनर्निर्र्माणका लागि जिल्लामा गठन भएको जिल्ला आयोजना कार्यान्वयन इकाइलाई लिखित जानकारी गराएर उनीहरुले काम गर्न नसक्ने बताएका हुन् । तलब, भत्ता, बिमा, सुरक्षा लजिस्टिक्स तथा अन्य विविध बिषयमा सरकारी निकायको ध्यानाकर्षण गराउँदा समेत बेवास्ता गरिएकाले काम गर्न छोडेको गोरखाको पन्द्रुङ गाविसमा खटिएका इन्जिनियर सञ्जिप अमगार्इंले बताउनुभयो ।
गोरखामा कार्यरत सम्पूर्ण प्राविधिकहरु सेवा सुविधाबारे नयाँ निर्णय गराउनका लागि चरणबद्ध आन्दोलनमा लागेको उहाँको भनाई छ । आन्दोलन अघि बढाउने क्रममा पुनर्निर्माणसँग सम्बन्धित सरकारले तोकेको कुनै पनि काम गर्न असमर्थ रहेको प्राविधिकहरुको पत्रमा उल्लेख छ ।
माग सुनुवाई नभएसम्म काममा नफर्कने गरि निर्णय भएको र आजैबाट काम रोकिएको अमगार्इंले बताउनुभयो । उनीहरुले जिल्ला प्रशासन कार्यालय र जिल्ला विकास समितिलाई पनि यसबारे जानकारी गराएका छन् । गोरखामा हाल १ सय २२ इन्जिनियर, २९ सव इन्जिनियर र ४८ असिस्टेन्ट सव इन्जिनियर कार्यरत छन् ।
झण्डै ५० इन्जिनियरको दरवन्दी पूरा हुन सकेको छैन । सरकारले उनीहरुलाई करारमा काममा खटाएको थियो । अधिकृत सरहको तलवमा काममा खटाइएपछि उनीहरुस सुरुदेखिनै असन्तुष्ट रहेका थिए । तर सेवा सुविधाबारे पुनर्विचार गरिने भनिएकाले त्यतिबेला काममा खटिएको इन्जिनियर अमगार्इंले बताउनुभयो ।
सदरमुकामबाट निकै टाढाको गाउँमा गएर तलवको भरमा मात्रै काम गर्न निकै समस्या परेको उनीहरुको भनाई छ । इन्जिनियरहरु कामबाट फर्कने भएपछि जिल्लामा पुनर्निर्माणको काम प्रभावित हुने देखिएको छ । अनुदान सम्झौता सकेर बैङ्क खातामा पहिलो किस्ता समेत पाइसकेका भूकम्पपीडितले हिउँद लाग्नासाथ घर बनाउन थाल्ने योजना बनाएका छन् ।
गोरखामा ४८ हजार भन्दा बढी प्रभावितसँग सम्झौता भएर पहिलो किस्ताको रकम पनि खातामा जम्मा भैसकेको छ । इन्जिनियरहरुको मागबारे केन्द्रमा जानकारी गराउने र जिल्ला तहमै पनि छलफल गर्ने तयारी भैरहेको जिल्ला आयोजना कार्यान्वयन इकाईका प्रमुख एवम् शहरी विकास तथा भवन निर्माण डिभिजन कार्यालयका प्रमुख श्यामकिशोर सिंहले बताउनुभयो ।
काममा खटिएका इन्जिनियरले कार्यक्षेत्रबाट फर्कने बताइरहेकै बेला रिक्त रहेका पदमा थप प्राविधिक जिल्ला खटिने भएका छन् । नयाँ इन्जिनियर, सव इन्जिनियर र असिस्टेन्ट सव इन्जिनियरलाई भोली बिहीबारबाट नियुक्ति दिएर कार्यक्षेत्रमा खटाउन लागिएको कार्यालयले जनाएको छ ।
ujyaaloonline
