कैलासबावु श्रेष्ठ/गोरखा
भाद्र १७ गते । स्थानीय तह पुनसंरचना प्राबिधिक सहयोग समिति गोरखाले गोरखाको पुनसंरचना सम्बन्धी सुझाव सहितको प्रतिवेदन आयोगमा बिहीबार पेश गरेको छ ।
समितिका संयोजक स्थानीय विकास अधिकारी नारायण प्रसाद आचार्यले जिल्लामा तयार पारीएको प्रतिवेदन आयोगका बालानन्द शर्मा पौडेललाई राजधानीमा बुझाइएको अधिकारी आचार्यले जानकारी दिए ।
आयोगले प्रतिबेदन बुझाउन दिएको समय सिमा अनुसार पुनसंरचनाका क्रममा जिललामा हुने इकाइका बारेमा दलहरु साझा सहमतिमा पुग्न नसकेपछि यसअघि साउन मसान्तभित्र बुझाउन तयार गरेको खाका नै पेश गरेको आचार्यले बताए । इलाका नम्बर १२ र १३ बाट आएको सुझाब र नेपाल बराम संघले दिएको सुझावलाई नोट अफ डिसेन्टमा टिप्पणीको रुपमा उल्लेख गरी प्रतिवेदन बुझाइएको जानकारी समेत दिए ।
आयोगमा बुझाइएको प्रतिबेदनमा राज्य पुनः संरचना अन्तरर्गत गोरखामा ६ गाउँपालीका र २ नगरपालीकाको सिमाङकनको प्रस्ताव गरिएको छ । स्थानीय तह पुनर्संरचना प्राविधिक सहयोग समितिले जिल्लाका दुई नगरपालीकामा मिमेकी केही गाविस थप्ने प्रस्ताव गरेको छ । प्रस्तावित खाका अनुसार गोरखा नगरपालीकामा ताप्ले, बुंकोट, बक्राङ र देउराली गाविसलाई समावेश गरीने भएको छ ।
अब बन्ने नगरपालीकामा कम्तीमा पनि ४५ हजार जन संख्या हुनुपर्ने भएकाले आसपासका गाविस समावेश गर्नु पर्ने प्राविधिक सहयोग समितिले सिफारीस गरेको हो । यि गाविस थप गर्दा गोरखा नगरपालीकाको जनसंख्या ५८ हजार पुग्ने छ ।
यस्तै पालुङटार नगरपालीकामा पनि आसपासका थप ५ गाविस गाभ्ने प्रस्तावमा उल्लेख छ । हर्मी, छोप्राक, खोप्लाङ, धुवाँकोट र मिरकोट गाविस पालुङ्गटारमा गाभ्ने प्रस्ताव गरिएको हो । यसपछि नगरपालीकाको जनसंख्या ४७ हजार पुग्ने देखिएको छ ।
राज्य पुनर्संरचना अन्तर्गतको केन्द्रिय आयोगले दिएको मापदण्ड अनुसार गोरखाका ६० गाविसलाई ६ गाउँपालीकामा विभाजन गरिएको छ । समितिले मनकामना र आसपासका ९ गाविस समेटेर माई मनकामना गाउँपालीका बनाउने प्रस्ताव गरेको छ । जसमा ताक्लुङ, घैरुङ, नामजुङ, फुजेल, ताङलीचोक, मकैसिङ, भूम्लीचोक, दरबुङ र घ्याल्चोक गाविस समावेश गरिने छ । सो गाउँपालीकाको केन्द्र मनकामनालाई प्रस्ताव गरिएको छ ।
यस्तै बगुुवा केन्द्र रहने गरि भिमसेन गाउँपालीका प्रस्ताव गरिएको छ । जसमा वरपरका पाँचखुवा देउराली, पन्द्रुङ, मसेल, अश्राङ, बोर्लाङ, धावा र तान्द्राङ गाविस रहनेछन् । सो गाउँपालीकाको केन्द्र वगुवाको लामाचौरलाई प्रस्ताव गरिएको छ । यस्तै सौरपानीलाई केन्द्र बनाएर राङरुङ गाउँपालीका बनाउन प्राविधिक सहयोग समितिले प्रस्ताव गरेको छ । जसमा ताकुकोट, ताकुमाझ लाकुरीबोट, लाप्राक, वारपाक, स्वाँरा र ताकुकोट गाविस रहनेछन् ।
गोरखा क्षेत्र नम्वर २ अन्तर्गतको उत्तरी १० गाविस मिलाएर अजिरकोट गाउँपालीका बनाइने भएको छ । जसमा गाँखु, श्रीनाथकोट, जौवारी, मुच्चोक, सिम्जुङ, थालाजुङ, केरावारी, हंसपुर, खरिबोट र घ्याच्चोक गाविस समेटिनेछन् । सो गाउँपालीकाको केन्द्र हंसपुरको भच्चेक प्रस्ताव गरिएको छ ।
अर्को गाउँपालीका जिल्लाको उत्तरी ७ सहित अरु दुई गाविस समेटेर बनाइने छ । जसमा सामागाउँ, ल्हो, प्रोक, बिही, चुम्चेत, छेकम्पार, सिर्दिवास, केरौंजा र उहीया गाविस रहनेछन् । मनासलु नाम दिइएको सो गाउँपालीकाको केन्द्र सिर्दिवासको फिलिममा रहने प्रस्ताव छ । जिल्लाको आरुघाट क्षेत्रका ८ गाविस मिलाएर आरुघाट गाउँपालीका बनाउने प्राविधिक सहयोग समितिको प्रस्ताव छ । जसमा आरुचनौटे सहित आरुपोखरी, आरुअर्वाङ, थूमी, मान्बु, काशीगाउँ, गुम्दा र लापू गाविस रहनेछन् । सो गाउँपालीकाको केन्द्र थूमीको आर्खेत रहने बताइएको छ ।
