भाद्र १६, २०७३- रातिको समयममा मोटरसाइकलमा घुम्न निस्कने र एक्लै हिडिरहेकालाई ढुंगा प्रहार गरी हत्यासमेत गर्दै आएका एक जना पक्राउ परेका छन् । भारतको मध्य प्रदेशको शिवपुरी जिल्ला, महल कोलोनी घर भई लेकसाइडमा ह्यान्डीक्राफ्ट पसल संचालन गर्दै आएका ३१ वर्षीय अखिलेश झालाई प्रहरीले पक्राउ गरेको हो ।

झाले पछिल्लो समय गत असार २४ गते राती पोखरा ८ मिलनपथको चौरमा गोरखा सिर्दीबास ३ घर भई पोखरा बस्दै आएकी २१ वर्षकी सुम्नी भन्ने स्मृति गुरुङलाई ढुंगाले हानेर गम्भिर घाइते बनाएका थिए । असार २५ को बिहान टाउकोमा गम्भिर चोट लागी अचेत अवस्थामा भेटिएकी गुरुङको उपचारका क्रममा भोलिपल्ट मृत्यु भएको थियो । तर प्रहरीले तत्काल हत्यारा पत्ता लगाउन नसकेपछि विशेष अनुसन्धान टोली खटाएको थियो ।

प्रारम्भिक बयानमा झाले रातीको समयमा एक्लै मोटरसाइकलमा घुम्ने र एक्लै भेटिएकालाई -विशेष गरी महिला) ढुंगाले हानेर घाइते बनाउँदै आएका थिए । ‘एक्लै भेटिएका महिलालाई राती किन हिडेका म पुर्‍याइदिन्छु भन्दोरहेछ,’ कास्की प्रहरीका प्रबक्ता डिएसपी गजुसिद्धि बज्रचार्यले भने, ‘नमानेपछि बाटो ढुकेर ढुंगाले हिर्काएर भाग्दोरहेछ ।’ कुनै बेला अलि असामान्य अवस्थामा देखिने -साइकेटीक) झा पसल बन्द भएपछि झा एक्लै बजारमा निस्कने र घटना गराउने उनले बताए । मिलनपथ, प्रदर्शनी केन्द्र, नयाँबजार, बगालेटोल, शिवालय चोक, बिरौटा लगायत स्थानमा ७ घटनामा संलग्न भएको स्विकारे पनि अन्यत्र पनि घटना गराएको अनुमान प्रहरीको छ । स्मृतिको मृत्यु भएको र अन्य ६ जनाको उपचार भएको पाइएको प्रहरीले जनाएको छ ।

बुधवार पक्राउ गरेको प्रहरीले विहीबार जिल्ला अदालतबाट कर्तव्य ज्यान मुद्धामा म्याद थपेर झाबिरुद्ध कारवाही प्रक्रिया सुरु गरेको छ । प्रहरीले झा चढ्ने ग६प ५२१० नम्बरको मोटरसाइकलसमेत बरामद गरेको छ । उक्त मोटरसाइकलमा चढेर रातीराती गल्लीगल्ली चाहार्दै हिड्ने गरेको प्रहरीले जनाएको छ ।