मन्त्री थापाले आयसियुमा छिरेपछि गंगामायाको अवस्थाबारे उपचारमा संलग्न डाक्टरहरुसँग जानकारी लिएका थिए । मन्त्री थापाले जानकारी लिएपछि डाक्टरहरुले गंगामायालाई गगन थापाको परिचय दिँदै स्वास्थ्यमन्त्री ज्यूलाई केही भन्नु छ? भनेर सोधेका थिए ।

त्यसको प्रतिउत्तरमा अधिकारीले भनिन्, ‘आफ्नो  छोराको अपराधीलाई कारबाही गरिदिनुस् भने, तर पनि पाँच वर्ष भइसक्यो कारबाही भएको छैन । तर अहिलेसम्म न्याय पाइएको छैन । न्यायको भीख माग्दा माग्दै श्रीमान वित्नु भयो ।’

गंगामायाले आफ्नो छोराको हत्यामा संलग्न छ जना रहेको र तिनीहरुलाई कानुनी दायरामा ल्याएर कारबाही गर्न माग गरिन् । उनले भनिन्, ‘छ जना छन् मेरो छोरा मार्ने ती अपराधीलाई कानुनी दायरमा ल्याउन सक्नुहुन्छ भने ल्याइदिनुहोस् । सक्नुहुन्न भने मलै ओढेको कात्रो बेर्न दिनुहोस् । मैले त्यति भन्न बाँकी छ । अरु मेरो भन्नु केही पनि छैन । अरु भन्न पनि सक्दिनँ । छोरालाई कन्चटमा गोली हाने । छोरालाई गोली हानेको भन्दा पनि मलाई ओछ्यानको फाँसी लागेको छ । यस्तोमा त प्रधानमन्त्रीको नजर लाग्दैन भने तपाइँ हामी जस्तोको के हाल होला ?’

गंगामायासँगको भेटमा मन्त्री थापाले आज बस्ने मन्त्रीपरिषद्को बैठकमा कुरा उठाउने बताए । ‘ठिक छ,’ उनले हात थम्थमाउँदै भने, ‘संयोग आज नै छलफल/बैठक (क्याविनेटको) छ आज नै म प्रधानमन्त्रीकोमा यो कुरा पुर्‍याउँछु । र, फेरि पछि आउँछु ।’

आइसियुमा गंगामायालाई भेटेपछि मन्त्री थापाले अस्पतालको क्यान्सर वार्ड र जेनेटेकी ल्याबको समेत निरीक्षण गरेका छन् । उनले त्यसक्रममा एक वर्षदेखि विग्रिएको क्यान्सर रेडियसनका विषयमा समेत जानकारी लिँदै बनाउन निर्देशन दिएका छन् ।

तस्बिरहरु: अंगद ढकाल