किरण लोहनी/उज्यालो ।

गोरखा, भदौ ९ – कालोबजारी गरेर मल बेचेको अभियोगमा प्रहरीले पक्राउ गरेका व्यवसायीलाई छुटाउन माग गर्दै गोरखा उद्योग बाणिज्य संघले बजार बन्द गराएको छ । बजार अनुगमनका क्रममा सदरमुकाम गोरखा बजराका ३ व्यवसायीले किसानलाई सरकारले अनुदानमा उपलब्ध गराएको मल आफ्नो पसलबाट बेचेको भेटिएको थियो ।

त्यस्तो मल जिल्ला कृषि विकास कार्यालयमा सूचीकृत भएका कृषि सहकारीबाट मात्रै बेच्नु पर्ने व्यवस्था छ । तर उनीहरुले अवैध रुपमा कालोबजारी गरेर मल बेचेको पाइएको अनुगमन टोलीको संयोजन गरेका सहायक प्रमुख जिल्ला अधिकारी नेत्रप्रसाद शर्माले बताउनुभयो ।

पर्याप्त आधार देखिएपछि मल कालोबजारी गरेर बेच्ने गोरखाका ३ पसलेविरुद्ध स्थानीय प्रशासनले मुद्दा चलाउने तयारी गरेको छ । त्यस्तो तयारी भएपछि गोरखा उद्योग बाणिज्य संघले वजार बन्द गराएको हो ।

संघका पदाधिकारी पसल बन्द गराउन आह्वान गर्दै माइकिङ गरेर हिँडेका थिए । उनीहरुले सार्वजनिक यातायात बन्द गराइदिन जिल्लाका दुई यातायात व्यवसायी समितिलाई अनुरोध गरेका छन् । तर सार्वजनिक बस सेवा भने चलिरहेको छ । पक्राउ परेका व्यवसायीलाई  कालोबजारी तथा केही सामाजिक अपराध ऐन २०३२ अन्तर्गत मुद्दा चलाउने तयारी गरिएको सहायक प्रमुख जिल्ला अधिकारी शर्माले जानकारी दिनुभयो ।

पक्राउ परेका व्यवसायीलाई बिनाशर्त रिहा गरिदिन माग गर्दै गोरखा उद्योग बाणिज्य संघका पदाधिकारीले बुधबार प्रमुख जिल्ला अधिकारीको ध्यानाकर्षण गराएका छन् । जिल्ला प्रशासन कार्यालय पुगेर उनीहरुले सकेसम्म लचिलो उपाय अपनाएर भएपनि उनीहरुलाई रिहा गर्न भनेका थिए ।

प्रमुख जिल्ला अधिकारी नारायणप्रसाद भट्टले भने व्यवसायीहरु अनुसन्धानको क्रममा रहेको भन्दै कसुर देखिए कानुन अनुसार कारवाही गर्ने बताउनुभयो । किसानलाई सरकारले अनुदानमा उपलब्ध गराएको रासायनिक मल पसलबाट बिक्री गरेको पाइएपछि उनीहरुलाई बुधबार प्रहरीले पक्राउ गरेको थियो ।

पक्राउ परेका व्यवसायीहरु अनु श्रेष्ठ, रामशरण कोइराला र इश्वर श्रेष्ठ विरुद्ध मुद्दा दर्ता गरी थप अनुसन्धान गरिने सहायक प्रमुख जिल्ला अधिकारी नेत्रप्रसाद शर्माले बताउनुभयो । बुधबार भएको बजार अनुगमनका क्रममा साल्ट ट्रेडिङबाट बिक्री  गरिने युरिया मल र कृषि सामग्री कम्पनीबाट सहकारी मार्फत बिक्री गरिने डिएपी उनीहरुका एग्रोभेट तथा किराना पसलबाट बेचेको पाइएको थियो ।

सहकारी संस्थाबाहेक अन्यत्रबाट बेच्न नपाउने अनुदानको मल गैरकानूनी रुपमा बेचेका गोरखा शक्तिचोकको अनिता एग्रोभेटका रामशरण कोइराला, हरमटारीको विशाल किराना स्टोर्सका अनु श्रेष्ठ र चाइनिजधाराको श्रेष्ठ किराना स्टोर्सका इश्वर श्रेष्ठलाई प्रहरीले पक्राउ गरेको हो ।

आफूले बेच्नु पर्ने मल बेचबिखनको जिम्मा दिने गोरखा नगरपालीका वडा नम्बर ५ को आदर्श बचत तथा ऋण सहकारी संस्था लिमीटेड, बुंकोटको बाह्रबिसे मिलन कृषि सहकारी संस्था लिमीटेड र बुङकोटकै पञ्चकन्या कृषि सहकारी संस्था लिमीटेडका सञ्चालकलाई पनि सोधपुछका लागि झिकाइने उहाँले बताउनुभयो । तीनवटै पसलबाट फरक फरक मुल्यमा  अवैध रुपमा मल बिक्री गरेको बिल पनि प्रसासनले बरामद गरेको छ ।

व्यवसायीको हकहीतमा गठन भएको उद्योग बाणिज्य संघलेनै बजार बन्द गराएको भन्दै केही व्यवसायी आक्रोशित भएका छन् । जिल्लामा यसअघि कुनै राजनीतिक दल वा संघसंगठनले बन्द गर्दा संघले विज्ञप्तिनै निकालेर विरोध गर्ने गरेको थियो । तर अहिले भने उसकै आह्वानमा बजार बन्द भएको हो ।

ujyaaloonline