हिमपातले ग्रस्त बनेको भूकम्प प्रभावित क्षेत्रमा नेपाली सेना राहत र स्वास्थ्यकर्मीको टोली सहित पुगेको छ । मौसम खराबीको कारण राहत र उद्धारमा भने समस्या हुने गरेको छ । भने चिसोले ग्रसित दुई सय जनाको उपचार गरेको छ ।
स्थानियमा रुघाखोकी, हाडजोर्नी दुख्ने, चिसोले पखला लाग्ने समस्या देखिएको डा. बिन्दु पाण्डे केसीले बताइन । चिसोका कारण शरीरभरि घाउखटिरा भएर आएकी स्थानीय ३० महिने बालिका गंगा गुरुङलाई सेनाको हेलिकप्टरले उद्धार गरि उपचारका लागि सदरमुकाम लगिएको छ ।
सेनाको टोलीले बारपाक र लाप्राक गाविसका पीडितहरुलाई पाँच सय थान स्लिपिङ ब्याग, ८ सय थान कम्बल, ११५ थान त्रिपाल, ३५ प्याकेट खानेकुरा र पानी भर्ने जर्किन वितरण गरेको भैरवी दल गणका गणपति शिवराज पन्तले जानकारी दिए । सेनाको हेलिकप्टर मंगलबार बिहान स्वास्थ्यकर्मीको टोली र राहत लिएर गुप्सीपाखामा बसेको थियो । पुनः दुई पटक राहत लिएर सदरमुकामबाट उडेको हेलिकप्टर मौसम खराबीको कारण अवतरण गर्न नसकेको हो ।
मौसम बिग्रेपछि हेलिकप्टरको उडान हुन नसकेर गुप्सीपाखामा नै अलपत्र पर्नु परेको पिन नामक संस्थाका प्रतिनिधि सुदीप जोशीले जानकारी दिए । सेनाको टोली हिडेर बारपाक आएपछि हेलिकप्टरले त्यहाँबाट सदरमुकाम पुर्याएको थियो ।
हिमपात पछि पानीको समस्या भएको स्थानीय डम्बर गुरुङले बताए । ‘मुहानमा हिउँ जमेपछि धाराका पानी सुक्यो’, उनले भने, ‘हिउँ पगालेर पानी खाने गरेका छौं ।’ हिउँ पग्लन थालेपछि अवरुद्ध बारपाक, लाप्राक, गुम्दा सडक खण्ड भने सुचारु हुन थालेको छ । राहत बोकेर गएका सवारी साधान आउजाउ गर्न थालेका छन् । हिमपातले अवरुद्ध टेलिफोन सेवा पनि मंगलबार दिउँसोबाट सुचारु भएको हो । अस्थायी शिविरमा अधिकांश सर्वसाधरण त्रिपाल र टेन्ट मुनी बसेकाले स्थायी प्रकृतिको घर वा अस्थायी टहरो तत्काल बनाउनु पर्ने राज गुरुङले बताए ।
ekantipur
