नेपाली समाजमा पशुपन्छी र जनावरहरूलाई प्रेम र घृणा गर्ने दुवैथरी मानिस छन् । कसैलाई जनावर भनेपछि यतिसम्म घृणा पैदा हुन्छ कि मरासन्न हुने गरी कुटपिटमा उत्रन्छन् ।
कसैले भने आफ्नो सन्तान झैँ जनावरलाई पालेको पनि देखिँदै आएको छ । विशेषगरि कलाकारहरुमा जनावर प्रेम बढी देख्न पाइन्छ । विदेशी कलाकार झैँ नेपाली कलाकारमा पनि जनावर प्रेम गजब छ ।
प्रियंका कार्की, वर्षा राउत, वर्षा सिवाकोटी, शुभेछा खड्का, अनुपविक्रम शाहीलगायतका कलाकारले घरमै कुकुर पालेका छन् । उनीहरु बाक्लै रुपमा कुकुरसँगका तस्विरहरु सामाजिक सञ्जालमा शेयर गरिरहेका छन् ।
नेपाली फिल्मका अहिलेका हटकेक अभिनेता अनमोल केसी पनि कुकुर प्रेमी हुन् । उनले घरमा एउटा कुकुर पालेका छन्, जसको नाम ‘कोको मोन्स्टर’ हो ।
अनमोल इन्स्टाग्राममा प्रायः दैनिक रुपमा कुकुरसँगका तस्विरहरु शेयर गरिरहेका हुन्छन् । उनले कुकुरको नाममा इन्स्टाग्राम एकाउन्ट समेत खोलेका छन् ।
आफ्नो र आफू अभिनीत फिल्मका तस्विरभन्दा इन्स्टाग्राममा ‘कोको’ सँग रमाएका तस्विरहरु शेयर गर्न मन पराउने उनी फिल्मको छायांकनका लागि राजधानीबाहिर जानु पर्दा समेत कुकुरलाई साथमै लिएर जाने गरेका छन् ।
कोरोनाका कारण जारी लकडाउन र निषेधाज्ञामा उनलाई दिन काट्ने साथी नै ‘कोको’ बनेको छ । फिल्म ‘पारस’ को स्क्रिप्टलाई बलियो बनाउन मिहेनत गरिरहेका उनी फुर्सदको समयमा कुकुरसँग खेल्ने गरेका छन् ।
आजभोली आफ्नो सबैभन्दा मिल्ने साथी नै कुकुर रहेको उनको भनाई छ । अनमोलले पालेको कुकुरलाई दर्शकहरुले फिल्म ‘ए मेरो हजुर ४’ मा पनि देख्न पाउनेछन् ।
