नायिका गौरी मल्लले प्रधानमन्त्री केपी शर्मा ओलीलाई हाँसोको होइन, गर्वको पात्र बन्न सुझाव दिएकी छिन् । उनले, प्रधानमन्त्रीलाई एक नागरिक भएको हैसियतले प्रश्न गर्ने अधिकार आफूमा भएको भन्दै लेखेकी छिन् ‘यहाँलाई आफूले बेला कुबेला बोलेका कुरा ट्रोल भैराख्दा,रमाइलो गर्ने माध्यम भैरहेको होला अथाव बानी परिसकेको होला । तर, हामी सर्वसाधारणलाई साह्रै लज्जावोध हुन्छ ।
किनकी, जसलाई हामीले अत्यन्त विश्वास गरेर देशकै शिर्षस्थानमा राखेका छौं, त्यो व्यक्ति हाँसोको होइन, गर्वको पात्र बनोस् । बिडम्बना त्यस्तो दिन कमसेकम हाम्रो जीवनमा आउन सकेको छैन ।’
उनले, भारतमा कोरोना प्रकोप बढिरहेको समयमा पनि नेपालीहरु धमाधम कामका लागि भन्दै भारत फर्किदा राज्यले रोक्न नसकेकोमा आक्रोश पोखेकी हुन् । उनले, भारतमा कोरोना बढ्दा आफ्ना नागरिकलाई नेपालमै बस, हामी जे गर्नुपर्ने हो गर्छौ भनेर किन भन्न राज्यले सकेन भन्दै प्रश्न गरेकी छिन् ।
कोरोनापछि सबै नागरिक नेपालमै एकत्रित भए, नेपालमै रोजागरी गर्ने समय आयो भनेर सबैले सोचेपनि सरकारलाई यी कुरामा कुनै सरोकार नरहेको स्पष्ट देखिएको पनि बताएकी छिन् ।
गौरीले देश र जनताको अवस्था सुधार गर्दै सानातिना रोजगार भएपनि दिनतर्फ लाग्न प्रधानमन्त्रीलाई आग्रह गरेकी छिन् । गौरीले लेखेकी छिन् ‘प्रधानमन्त्रीज्यू, यो देश तपाइको घर हो । हामी जनता तपाइका नै परिवार हौं । यो कुरालाई आत्मसाथ गर्नुहोस् । आज जनता जानीजानी आगोमा होमिन जाँदैछन्, उनीहरुको जीवन रक्षा गर्ने कर्तव्य तपाइकै हो ।’
गौरीले सिंहदरबार र बालुवाटार भन्दा पनि बाहिर नेपाल रहेको कुरा नविर्सन प्रधानमन्त्रीलाई आग्रह गरेकी छिन् ।
