कोरोना भाइरससँग लडिरहेका प्रशिद्ध भारतीय गायक एसीपी बालासुब्रमण्यमको स्वास्थ्यमा गम्भीर समस्या देखिएको छ। स्वास्थ्यमा थप समस्या देखिएपछि उनलाई आईसीयुमा भर्ना गरिएको भारतीय सञ्चारमाध्यमले जनाएका छन्।
अस्पताल भर्नापछि स्वास्थ्यमा सुधार देखिए पनि बिहीबार रातिदेखि उनको स्वास्थ्यमा थप समस्या देखिएको बताइएको छ।
अगष्ट ५ मा कोरोना भाइरसको संक्रमण पुष्टि भएपछि उनलाई चेन्नईको एमजीएच हेल्थ केयरमा भर्ना गरिएको थियो। उनी चिकित्सकको निरन्तर निगरानीमा रहेको बताइएको छ।
उनले आफूलाई कोरोना पुष्टि भएपछि सामाजिक सञ्जालमा भिडियोमार्फत त्यसको जानकारी गराएका थिए। आफूलाई केही दिनदेखि सामान्य रुघा र ज्वरो देखिएपछि कोरोना परीक्षण गर्दा रिपोर्ट पोजेटिभ आएको उनले जानकारी गराएका थिए।
७४ वर्षीय बालासुब्रमण्यमले विभिन्न १६ भाषामा ४० हजारभन्दा बढी गीत गाइसकेको छन्। उनलाई भारत सरकारले पद्म भूषणबाट सम्मानित गरिसकेको छ। उनले हिन्दीका साथै तेलगु, तमिल, कन्नडा, मलयालम लगायतका भाषामा गीत गाएका छन्। उनको नाम गिनिज वर्ल्ड रेकर्डमा समेत छ।
