‘भुवन चैत्य बसुन्धरा’ फाउन्डेसनले यस वर्षको ‘चैत्यदेवी सिंह पुरस्कार’ मह जोडीलाई प्रदान गरेको छ । मंगलवार राजधानीमा फाउन्डेसनकी अध्यक्ष बसुन्धरा भुसालको अध्यक्षतामा भएको कार्यक्रममा मदनकृष्ण श्रेष्ठ र हरिवंश आचार्यलाई ५१ हजार राशीसहित सम्मान प्रदान गरिएको हो । यो फाउन्डेशनले हरेक वर्ष कला क्षेत्रमा आबद्ध व्यक्तिहरुलाई पुरस्कृत गर्दै आएको छ ।
कोरोना भाइरसको संक्रमणको जोखिमलाई ध्यानमा राख्दै सम्मान कार्यक्रममा ठूलो जमघट गरिएको थिएन । मह जोडीलाई कलाकार संघका अध्यक्ष रविन्द्र खड्काले रुद्राक्षको माला लगाइदिएका थिए भने भुवन–हरिष चन्दले दोसल्ला ओढाएर सम्मान गरेका थिए । कला क्षेत्रमा लामो समयदेखि योगदान पुर्याएको भन्दै उनीहरुलाई नगद राशीसहित सम्मान गरिएको हो ।
उक्त फाउन्डेसनले केही दिनअघि नृत्य निर्देशक भैरव बहादुर थापालाई ‘हरिश भुवन चन्द पुरस्कार’ र चरित्र अभिनेत्री शकुन्तला शर्मालाई ५१ हजार नगद राशीसहित ‘चेतनारायण बसुन्धरा भुसाल पुरस्कार’ बाट सम्मान गरेको थियो । भुवन चन्द नेपाली फिल्मको पहिलो नायिका, चैत्य देवी प्रथम रंगीन नेपाली फिल्मकी नायिका र बसुन्धरा भुषाल प्रथम हास्य अभिनेत्री हुन् ।
