केही दिनयता टिकटकमा एक गीतले राम्रो चर्चा बटुलिरहेको छ । अमृत क्षेत्री र मेलिना राईको स्वरमा रहेको ‘जहाजै चढेर’ बोलको गीतमा थुप्रैले टिकटक बनाएका छन् । यूट्युबमा पनि यो गीतलाई उम्दा प्रतिक्रिया मिलेको छ । साढे ४ लाखभन्दा बढी भ्यूज प्राप्त गरिसकेको गीतलाई १५ हजार लाइक्स र ९ सयभन्दा बढी कमेन्ट प्राप्त छ । कमेन्ट बक्समा गीतको प्रशंसाले भरिएका प्रतिक्रिया मात्र छन् ।
अमृत क्षेत्रीको शब्द तथा संगीत रहेको गीतमा विवी अनुरागीको संगीत संयोजन छ । ‘फाटेको जुत्ता’ फेम्ड निर्देशक निकेश खड्का निर्देशित गीतको भिडियोमा नेपाली चलचित्रका चर्चित अभिनेता दयाहाङ राई र केनिपा सिंह पहारीले मनछुने अभिनय गरेका छन् । यसअघि यी दुईले चलचित्र ‘साइँली’ मा अभिनय गरेका थिए । बुद्ध थापाको छायांकन रहेको भिडियोको सम्पादन विकास धमलाले गरेका हुन् ।
गीतको भिडियो चलनचल्तीको भन्दा पृथक शैलीमा तयार पारिएको छ । मण्डला थिएटरभित्र खिचिएको भिडियोलाई नाटक शैलीमा बनाइएको छ । सम्भवतः थिएटरभित्र खिचिएको र नाटक शैलीमा निर्माण भएको यो पहिलो गीत हो । पछिल्लो समय महँगो सेट लगाएर वा आकर्षक लोकेशनमा गीत खिच्ने गरिन्छ । थिएटरभित्रै खिचिए पनि ‘जहाजै चढेर’ गीत आकर्षक बनेको छ । भिडियोको कन्सेप्ट निर्देशक खड्का र अभिनेता दयाहाङको हो ।
गायक क्षेत्रीका अनुसार, भिडियोको कन्सेप्ट र सेटअपका लागि एक महिनाभन्दा बढी समय लागेको थियो । गीतको भावअनुसार भिडियो तयार भएकोमा उनी खुसी छन् । यो गीत आफ्नो करिअरको दोस्रो टर्निङ पोइन्ट मान्छन्, उनी । लकडाउनको समयमा उनलाई यो गीत फुरेको थियो र लकडाउन अन्त्य भएपछि गीतको छायांकन गरिएको थियो । गीतलाई मिलेको सकारात्मक प्रतिक्रियाले आफूलाई उत्साहित बनाएको गायक क्षेत्री बताउँछन् ।
गीतको बारेमा उनी भन्छन्, ‘गीतले कोरोनाका कारण स्वदेश फर्किन नपाएका युवाहरुको कथा भन्छ । यो समयमा सबैलाई आफ्नो परिवारसँग बस्ने मन हुन्छ । तर, परदेशमा रहेका युवाहरु चाहेर पनि स्वदेश फर्किन पाएका छैनन् । गीतले यही कथा वाचन गरेको छ । गीत लेख्दै गर्दा म आफैं पनि कति ठाउँमा भावुक भएको थिएँ ।’ उनले थिएटर बेसमा भिडियो बनाउनु चुनौतीपूर्ण भए पनि दर्शकले रुचाएकोमा खुसी व्यक्त गरे ।
भिडियो :-
