गोरखा समाचारदाता
गोरखा – पछिल्लो समय गोरखा सदरमुकाम आसपासमा चोरीका घटना बढेका छन ।
दिनहुँ धनमाल चोरी भउको भन्दै स्थानीयले गुनासो गरिरहेका छन । हरमटारी चोक नजिकैको एक व्यपारिक संस्थाबाट टिभि चोरी भएको केही दिन बित्न नपाउदै सोही आसपासबाट गरगहना र अन्य सामान चोरी भएको छ ।
बुधबार साँझ गोरखा नगरपालिका–६ का ३ घरमा चोरी भएको स्थानीयले बताएका छन । धुब्रकुमार भट्टको घरबाट सुनको छड्के तिलहरी, रानीहार, शिरवन्दि र औठी एक÷एक थान चोरी भएको भन्दै प्रहरीमा उजुरी परेको छ ।
सोही ठाउँकी शारदा लामिछानेको ट्यावेट चोरी भएको बताइएको छ । दैनिक जसो चोरीका घटना हुन थालेपछि सर्वसाधरण चिन्तित भएका छन ।
सिसिटिभीको निगरानीमा रहेको गोरखा बजार क्षेत्रमा खुलेयाम चोरी डकैतीका घटना भएपछि जिल्लाको सुरक्षा व्यवस्थालाई लिएर धेरैले आशंका व्यक्त गरेका छन् ।
जिल्ला प्रहरी कार्यालय गोरखाका डिएसपी मित्रबन्धु शर्माले भने सुरक्षा सर्तकता अपनाइएकाले छिट्टै चोरलाई पक्राउ गरी कारवाही गर्ने बताए ।
