नरेन्द्र ढकाल
गोरखा – विदेशमा बस्ने गोरर्खालीको संस्था गोरखा सेवा समाजले मानव सेवा आश्रम गोरखालाई आर्थिक सहयोग गरेको छ । सडकमा बेसाहारा जीवन बिताइरहेका मानिसहरुलाई आश्रय दिइरहेको आश्रम सञ्चालन मा सहयोग पुरयाउने उदेश्यले २ लाख ५० हजार रकम प्रदान गरिएको हो ।
‘नेपाललाई सडक मानव मुक्त बनाउने अभियानका साथ उहाँहरु लागिरहनुभएको छ, गोरखा नगरपालिका मानव मुक्त घोषणा भइसकेको छ’ गोरखा सेवा समाजका अध्यक्ष कैलाशबाबु श्रेष्ठले भने ‘उक्त अभियानलाई थोरै भएपनि सहयोग पुगोस् भनेर हामीले यो सहयोग गरेका हौं ।’ गोरखा सेवा समाज कतारले रोगजारीका लागि कतार पुगेका गोरर्खालीहरुसँग संकलन गरेको उक्त रकम गोरखा सेवा समाज मार्फत शनिवार मानव सेवा आश्रमलाई हस्तान्तरण गरिएको हो ।
समाजको पहिलो अधिवेशन तथा तेश्रो साधारण सभाको अवसरमा गोरखामा आयोजित एक कार्यक्रमका वीच गोरखा नगरपालिकाका प्रमुख राजनराज पन्तले आश्रमका केन्द्रिय अध्यक्ष रामजी अधिकारीलाई उक्त रकमको चेक हस्तान्तरण गरेका हुन् । ‘गोरखा नगरपालिकाले नेपालकै पहिलो सहयोगापेक्षी सडक मानव मुक्त नगर बन्ने जुन सौभाग्य प्राप्त गरेको छ’ नगर प्रमुख पन्तले भने ‘हामी सबैले यस्तै सहयोग गर्न सक्यौं भने पुरा नेपाललाई नै एक दिन सडक मानव मुक्त बनाउन सकिन्छ, भन्ने लाग्छ ।’
रकम बुझ्दै मानव सेवा आश्रमका अध्यक्ष अधिकारीले कतारमा बस्ने गोरर्खालीहरुले आफ्नो गाँस कटाएर नेपाललाई सडक मावन मुक्त बनाउने अभियानमा सहयोग गरेको प्रति आभार व्यक्त गरेका थिए । ‘कतारमा बस्ने गोरर्खाली दाजुभाई यति ठूलो पुण्यको काम गर्नुभएको छ म शब्दमा व्यख्या गर्न सक्दिन’ उनले भने ‘यसरी नै सबैको साथ सहयोग मिल्यो भने अब छिट्टै हामी नेपाललाई सडक मानव मुक्त बनाउन सक्छौं ।’
समाजले मानव सेवा आश्रम गोरखालाई यस अघि पनि २ लाख सहयोग गरेको थियो । यस अघिको २ लाख र अहिलेको २ लाख ५० हजार गरी ४ लाख ५० हजारको अक्षय कोष स्थापना गर्ने बताइएको छ । उक्त रकमको ब्जाज मानव सेवा आश्रम गोरखामा रहेका बालबलिकाहरुको शिक्षा र भरणपोषणमा खर्च गर्न सकिने समाजका अध्यक्ष श्रेष्ठले बताए । त्यसको अलवा पनि विभिन्न पटक गरेर झण्डै एक लाख रकम सहयोग गरिएको समाजले जनाएको छ ।
असहाय तथा अनाथ बालबालिकाको क्षेत्रमा काम गर्दै आएको आश्रमको गोरखा शाखा २०७३ साल चैत्र ५ गते स्थापना भएको थियो । मनाव सेवा आश्रमले गोरखा शाखालाई बालगृहको रुपमा सञ्चालन गर्दै आइरहेको छ । आश्रममा देशभरबाट उद्धार गरिएका ३६ जना असहाय र अनाथ बालबालिका आश्रममा आवासिय सुविधा सहित बस्दै आएका छन् ।
उनीहरुको पठनपाठनको व्यवस्था पनि आश्रमले नै गरेको गोरखा शाखा संयोजक मुना लामाले जानकारी दिए । सडक मानवको पनि उद्धार गर्दै आएको आश्रमले गोरखा नगरपालिकालाई सडक मानव मुक्त घोषणा समेत गरिसकेको छ । मुठ्ठी दान मार्फत भाडाको घरमा सञ्चालन भइरहेको आश्रमले आफ्नो घर बनाउने योजना समेत बनाएको छ ।