गोरखा समाचारदाता
काठमाण्डौं – किशोरी बलात्कार आरोपमा अखिलका केन्द्रिय सदस्यलाई प्रहरीले संघिय राजधानीबाट पक्राउ गरेको छ ।
१८ बर्षिया पीडित किशोरीको बयान र उजुरीका आधारमा अखिलका केन्द्रीय सदस्य इन्द्रहाङ राईलाई महानगरीय प्रहरी वृत्त बौद्धले आज (मङ्गलबार( बिहान पक्राउ गरेको हो । राई आरआर क्याम्पस स्वतन्त्र विद्यार्थी युनियनका बहालवाला सह–सचिवसमेत हुन् ।
पीडित किशोरीले सोमबार राती प्रहरीलाई सम्पर्क गरी आफूलाई राईले बलात्कार गरेको आरोप लगाएकी थिइन् । त्यसलगत्तै परिचालन भएको प्रहरीले किशोरीलाई राती नै उद्धार गरेको थियो भने आरोपित राईलाई मंगलबार बिहान ६ बजे पक्राउ गरीएको प्रहरीले जनाएको छ ।
पीडित किशोरीले प्रहरीलाई दिएको प्रारम्भिक बयानमा राईले गोकर्णेश्वर–६ माकलबारीमा रहेको राईकै साथीको कोठामा लगी किशोरीलाई बलात्कार गरेका हुन् ।
महानगरीय प्रहरी परिसर काठमाडौंका प्रवक्ता होबिन्द्र बोगटीका अनुसार यतिबेला आरोपितलाई पक्राउ गरी अनुसनधानको काम भइरहेको छ । पीडित किशोरीको मेडिकल जाँच भई रहेको छ ।
