गोरखा समाचारदाता
गोरखा – यम पञ्चकको पाँचौं दिन अर्थात भाईटीका । आज देश तथा विदेशमा भएमा हिन्दु धर्मालम्बीहरुले भाइटीका मनाउने गर्दछन ।
आफ्ना दिदीबहिनीले दाजुभाइको दीर्घायुको कामना गर्दै मनाइने यो पर्वको आज अन्तिम दिन हो । आज कात्तिक शुक्ल द्वितीयाको दिन यो पर्व मनाउने गरिन्छ ।
आजैका दिन यमुनाले आफ्ना भाई यमलाई टीका लगाएपछि यमराजले बहिनी यमुनाको इच्छा अनुसार यस दिन दिदीबहिनीको हातबाट टीका लगाउनेहरुलाई तेलको धारो नसुकेसम्म र मखमली फूल नओइलिएसम्म मृत्युवरण गर्नु नपर्ने आशीर्वाद दिएका थिए भन्ने किबन्दती पाईन्छ। सोही समयदेखि यो पर्व मनाउन थालिएको जन विश्वास समेत रही आएको छ । यस्तै किंवदन्तीहरुका अनुसार कात्तिक शुक्ल द्वितीयाको पनि विशेष कारणले महत्वपूर्ण छ ।
द्वितीयाको दिन दाजुभाइ र दिदी बहिनीबीचको प्रेम र आपसी सद्भावको पर्व मानिन्छ । यो दिन दिदीबहिनीले दाजुभाइलाई आफ्नो घरमा बोलाएर आफ्नै हातबाट बनेको स्वादिष्ट भोजन गराउने गर्छन् । भोजनपछि आफ्नो दाजु या भाइहरुलाई निधारमा सप्तरंगी टीका लगाउने गरिन्छ । यही दिन आफ्नो घरको मूलद्वारमा ओखर फुटाउने चलन समेत छ । आफ्ना भाइहरुको सबै पीडाहरु ओखरसँगै फुटेर जान्छ भन्ने मान्यताको प्रतीक पनि भाईटीका हो ।
शास्त्रानुसार आजको दिनमा जुन भाइले आफ्नो घरमा भोजन गर्छ उसलाई दोष लाग्ने समेत मान्यता छ । यदि बहिनीको घर जान असम्भव भएको खण्डमा कुनैपनि नदीको तटमा या गाइलाई नै आफ्नो बहिनी मानेर उसको समीप गएर भोजन गर्नुपर्छ भन्ने समेत मान्यता छ ।