गोरखा समाचारदाता
गोरखा – लामो समय देखीको लाइसेन्स वितरणका लागि सहज गर्ने गरी ल्याइएको मास प्रिन्टले पनि काम नगरे पछि झनै समस्या आएको छ ।
विगतमा थोरै मात्र लाईसेन्स प्रिन्ट भएको भन्दै ठुलो संख्यामा लाईसेन्स निकाल्नका लागि मास प्रिन्ट ल्याइएको थियो ।
यातायात व्यवस्था विभागले तीन महिना अघि ल्याएको मासप्रिन्टर सञ्चालन गर्न नसक्दा लाइसेन्स प्राप्त गर्न बाँकी सङ्ख्या बढेर ६ लाख बढी पुगेको छ ।
ग्लोबल टेन्डर मार्फत १ घण्टामा ४५० कार्ड प्रिन्ट गर्नसक्ने क्षमताको मासप्रिन्टर ल्याएको थियो । ठेक्का पाएको मद्रास सेक्युरिटी प्रिन्टिङ प्रेसले प्राविधिक कारण देखाउँदै ढिलाइ गरिरहेको विभागले जानकारी दिएको छ । सफ्टवेयर अपलोड, एप्लिकेसन इन्स्टल र परीक्षण भन्दै ढिलाइ गरीरहेको छ ।
ठेकेदार कम्पनीले प्राविधिक कारण देखाउँदै ढिलाइ गरिरहेपछि विभागका अधिकारीहरू पनि हैरान भएका छन् । विभागका अनुसार समस्या समाधान नहुने देखिए पछि थप अर्को मासप्रिन्टरका लागि पैसा व्यवस्थापन गरीएको छ ।
विभागले ४ वर्षदेखि मागअनुसारको लाइसेन्स वितरण गर्न सकेको छैन । दैनिक नौ हजार प्रति लाइसेन्सको माग छ । हाल भएको संरचनाले दैनिक ३ हजारप्रति सम्म प्रिन्ट गर्न सक्छ । जसका कारण प्रिन्ट गर्न बाँकी लाइसेन्सको सङ्ख्या ६ लाख पुगेको हो ।
विभागले वैदेशिक रोजगारीमा जाने, शान्ति मिसनमा जाने वा अत्यावश्यक भनेर सम्बन्धित कार्यालयले तोक लगाइदिएको खण्डमा एक दिनमै लाइसेन्स प्रिन्ट गर्ने व्यवस्था समेत गरेको छ ।
