गोरखा समाचारदाता
गोरखा – गत साउन १७ गते दरौंदी गोरखा (बृहत पम्पिङ) खानेपानी तथा सरसफाई उपभोक्ता संस्थाले जिल्ला सदरमुकाममा पत्रकार सम्मेलन गरयो । खानेपानीको चरम समस्या भोग्दै आएका जिल्ला सदरमुकामबासीलाई खुसिको खबर भन्दै संस्थाका अध्यक्ष बद्री मास्केले दशैमा उपभोक्ताका घरघरमा पानी खसाल्ने घोषणा गरे ।
उनले त्यत्तिबेला भनेका थिए ‘अब जिल्ला सदरमुकाममा पानीको कुनै अभाव हुँदैन, दशै अघि उपल्लोकोटको ट्याङ्कीमा खसाल्छौ भनेर ठेकेदार र आयोजना प्रमुखले भनेका छन्, अब छिट्टै दरौंदीको पानी आउँछ ।’
तर दशै सकिएर तिहार आइपुग्नै लाग्दा दरौंदी लिफ्टिङले भाका फेरेको छ । अहिले मंसिरसम्म काम सम्पन्न गरी पानी वितरण गर्ने भनिएको छ । ‘हिजो मिटिङमा ठेकेदार बोलाएर सोध्यौं’ उनले भने ‘एक महिना त होइन्, मंसिरसम्म आउछ भनेको छ ।’
त्यसको केही दिन अघि पत्रकारहरुसँग कुराकानी गर्दै संघीय खानेपानी तथा ढल व्यवस्थापन आयोजनाका प्रमुख रामचन्द्र काफ्लेले ८५ प्रतिशत काम सकिएको भन्दै दशै अघि नै पानी खसाल्ने दाबी गरेका थिए । त्यत्तिबेला उनले यसो भनेका थिए, ‘समय त हामीसँग अझै १ वर्ष छ तर ८५ प्रतिशत काम सकिसकेको छ, दशै अघि नै सबै काम सकेर उपल्लोकोटमा पानी पु¥याउँछौं, दशैमा त उपभोक्ताको घरमै पानी आउँछ ।’
आयोजनको कार्यप्रगती सार्वजनिक गर्न हानथाप गरेका समिति र आयोजना कार्यालय दुबै अहिले पन्छिन खोजेका छन् ।
एकले अर्कालाई दोष देखाएर पानी माथिको ओभानो बन्ने प्रयास भइरहेको छ । ‘काम गर्ने ठेकेदारले हो, काम लगाउन आयोजना कार्यालयले हो’ समितिका अध्यक्ष मास्केले भने ‘उहाँले नै दशैमा पानी आउँछ भन्नु भयो हामीले पत्रकार सम्मेलन गरेर सार्वजानिक मात्र गरेका हौं, यसमा हाम्रो केही गल्ती छैन् ।’
हतारमा पानी ल्याउनु भन्दा ढिलो गरेर भएपनि शुद्ध सफा पानी वितरण गर्नुपर्ने समितिको भनाई रहेको उनले बताए । ठेकेदारले टालटालु गरेर छिटो काम भ्याउने तर सफा पानी नदिने योजनामा लागेको भन्दै अध्यक्ष मास्केले त्यसको लागि खानेपानी व्यवस्था विभागमा डेलिकेसन जाने निर्णय समेत गरिएको बताए ।
यता संघीय खानेपानी तथा ढल व्यवस्थापन आयोजनाका प्रमुख रामचन्द्र काफ्लेले भने विद्युत प्राधिकरणका कारण घोषित मितिमा पानी उपलब्ध गराउन नसकेको दाबी गरेका छन् । ‘विजुलीको काम साउनमै भ्याउनु पर्ने थियो, अहिलेसम्म सकिएको छैन’ उनले भने ‘त्यसलै गर्दा पानी दिन नसकिएको हो ।’
विद्युतको काम अबको दश दिन भित्र सकिने उनले बताएका छन् । विद्युतको लाइन बिस्तार गर्ने क्रममा स्थानीयले अबरोध गरेपछि भएको विवाद पनि समाधान भइसकेको आयोजना प्रमुख काफ्लेको भनाई छ । ‘लाइनको काम सकिने बित्तिकै हामी पम्प टेष्ट गछौं,’ उनले भने ‘त्यसको केही समय भित्र त पानी उपलब्ध भइहाल्छ ।’
खानेपानीको चरम समस्या भोगिरहेको सदरमुकामबासी दशैमा दरौंदी लिफ्टिङको पानी आउने भयो भन्दै खुसि भएका थिए । तिहार लागिसक्दा समेत पानी नआएपछि उनीहरु आयोजनाले ढाँट्यो भन्दै निराश भएका छन् ।
६० करोड लागतमा ४ हजार ४ घरधुरीलाई स्वच्छ खानेपानी उपलब्ध गराउने उदेश्य सहित २०७४ असारबाट आयोजना निर्माण सुरु गरिएको हो । तुदी रमन जेभीले निर्माण गरेको उक्त खानेपानी आयोजनाको पानी गोरखा नगरपालिकाको वडा नम्बर ३ देखि ९ सम्मका स्थानीयले प्रयोग गर्नेछन् ।
उक्त आयोजनाले चौबिसै घण्टा प्रति सेकेन्ट ३१ लिटर पानी तान्न सक्ने भएकाले जिल्ला सदरमुकाममा अब पानीको समस्या नहुने विश्वास लिइएको छ ।
