गोरखा समाचारदाता
गोरखा – गण्डकी प्रदेशका ५ जिल्लाका प्रधानाध्यापकहरुको नेतृत्व क्षमता विकास सम्बन्धि १० दिने तालिम बुधबार सम्पन्न भएको छ ।
तालिम समापन पूर्व महिला तथा बालबालिका मन्त्री एवं गण्डकी प्रदेश सांसद आशा कोइरालाको प्रमुख आतिथ्यतामा सम्पन्न भएको थियो । समापन कार्यक्रममा बोल्दै पूर्व मन्त्री कोइरालाले तालिममा सहभागी प्रधानाध्यापकहरु लाइ शिक्षा क्षेत्र र राष्ट्रप्रति जवाफदेहि हुन आग्रह गरीन । सामुदायिक विद्यालयमा कार्यरत शिक्षक दक्ष र तालिमप्राप्त छन, त्यसैले विद्यालयको गुणस्तरमा पछाडि पर्न नहुने उनको तर्क थियो ।
साँसद कोइरालाले विद्यालयको भौतिक वातावरण तयार गर्ने दायित्व राज्यको भएको र विद्यालयको शैक्षिक र प्रशासनिक वातावरण राम्रो बनाउने जिम्मेवारी विद्यालयका प्रधानाध्यापकको हुने समेत बताईन ।
तालिममा नवलपुर, तनहुँ, गोरखा, लमजुङ र मनाङ जिल्लाका ५० जना प्रधानाध्यापकहरुको सहभागिता रहेको थियो ।
शिक्षा तालिम केन्द्र दमौली तनहुँमा भएको तालिम असोज २७ गतेदेखि शुरु भएको थियो ।
तस्बिर सौजन्य प्रेम न्यौपाने