गोरखा समाचारदाता
गोरखा – गोरखा नगरपालिका वडा नम्बर ८ मा रहेको स्थानीय सभाले सुशासन प्रवद्र्धनमा जोड दिएको छ । सार्वजानिक निकायको सेवा प्रवाह र विकास निर्माणलाई पारदर्शी र जवाफदेहि रुपमा सञ्चालन गर्न भन्दै सभाले आइबतार अन्तरक्रिया कार्यक्रम आयोजना गरेको हो । स्थानीय सभाका अध्यक्ष भिषण अर्यालको अध्यक्षतामा भएको कार्यक्रममा गोरखा नगरपालिकाका प्रमुख राजनराज पन्तको प्रमुख आतिथ्यता रहेको थियो ।
कार्यक्रममा बोल्दै नगरप्रमुख पन्तले सुशासन प्रवद्र्धनका लागि आफु कार्ययोजना सहित अघि बढेको बताए । सुशासन नीति निर्माणसंगै नगरपालिकाले सञ्चालन गरेका हरेक गतिविधी र योजनाहरुको अनुगमन नागरिक समाज र सञ्चरकर्मी सहितको टोलीबाट गर्ने कार्य आरम्भ गरिसकेको बताउदै उनले सबै पक्षलाई पारस्परिक जवाफदेहिताका लागि जोड दिए । ‘सुशासन मैले मात्रै चाहेर प्रवद्र्धन हुदैन, यसमा सबै पक्ष जिम्मेवार बन्न जरुरी छ’ नगरप्रमुख पन्तले भने ‘हामीले गरेका कामको निगरानी गर्नुस्, अनुगमन गर्नुस् ।’
नागरिक समाजसंगको सहकार्यलाई अघि बढाउन नीति नै निर्माण गरी साझेदारी मञ्चको अवधारणा देशभरका स्थानीय तह मध्ये पहिलो पटक आफुले नै सुरुवात गरेको उनले बताए ।
नगरको विकासका लागि कार्यालयले मात्रै चाहेर नहुने तर्क दिदै उनले यस अभियानमा नगरवासीको साथ र सहकार्य आवस्यक रहेको बताए । टोल–टोलका समस्या उजार गरी समाधान गर्ने बाटोका लागि छलफल गर्ने माध्यम स्थानीय सभा बनेको भन्दै नगरप्रमुख पन्तले यसबाट सकरात्मक सुझावको अपेक्षा आफुले गरेको बताएका छन् ।
कार्यक्रममा बोल्दै वडा नम्बर ८ का वडाध्यक्ष कृष्णबहादुर खत्रीले स्थानीय सभालाई वडाको विकासको सहयात्रीका रुपमा आफुले लिएको बताए । वडामा सञ्चालन हुने योजनाहरुको प्रभावकारी अनुगमन गर्ने जिम्मा र दायित्व स्थानीयवासी कै रहेको बताउदै खत्रीले हरेक गतिविधीमा स्थानीय सभाका प्रतिनिधीको सहभागिता सुनिश्चित गर्ने प्रतिवद्धता ब्यक्त गरे ।
कार्यक्रममा नागरिक साझा सवालका संयोजक स्थानेश्वर दुवाडी, समाजवादी पार्टीका नगर संयोजक उपेन्द्र देवकोटा, नेकपाका वडा अध्यक्ष बाबुराम कट्टेल, नेपाली काँग्रेसका वडा सभापति खिलबहादुर थापा लगायतले बोलेका थिए ।
त्यस्तै कार्यक्रममा उपस्थित भएका १९ वटा टोल विकास संस्थाका प्रतिनिधीहरुले आ–आफ्नो टोल र गाउँका समस्या राखेका थिए । कार्यक्रममा दशै तिहार लगायतका चाडपर्वको शुभाकामना समेत आदानप्रदान भएको थियो ।
