मोहसिन अलि मिया
गोरखा – अहिले जिल्लाका अधिकांश सडकमा चल्ने यातायातका साधानमा दशैं मनाएर फर्किनेको भिडभाड देखिन्छ । गोरखा घर भई देशका विभिन्न भु-भागमा बसोबास गर्दै आएका सर्वसाधारणले दशैं सकिएसँगै आ-आफ्नो गन्तब्यको यात्रा तय गरेपछि जिल्लाका अधिकांश छोटो तथा लामो दुरीको यातायातका साधन यात्रुले खचाखच भरिएका छन् ।
यात्रु बोक्न पाउने बस, ट्याक्सी मात्रै होइन अहिले जिल्लाका अधिकांश ग्रामिण सडकमा ट्रक, टिप्पर, ट्याक्टर र जिपहरुमा समेत सर्वसाधारण सकस र जोखिमपूर्ण यात्रा गर्न बाध्य छन् ।
त्यसो त यात्रा मात्रै सकसपूर्ण छ नै भाडा पनि साबिकको भन्दा ‘त्रिबल’ तिर्नुपर्ने बाध्यता छ । दशैंको मौका छोपेर जिल्लामा संचालनमा रहेका यातायातका साधनले यात्रुहरुसँग मनोमानी भाडा लिने गरेको पाइएको हो ।
टिकट काउण्टरबाट टिकट नदिने र बस, माइक्रोले रिजर्भ भन्दै साबिकको भन्दा तेब्बरसम्म भाडा असुल्ने गरेको यात्रुहरुको गुनासो छ । ‘काउण्टरमा टिकट सबै बुक भइसक्यो भन्छन्, बसमा गए रिजर्भ हो जहाँ ओर्लिएपनि ५ सय लाग्छ भन्छन्’ आरुघाटबाट सदरमुकाम आएका सुकमान गुरुङले भने ‘२ सयको ठाउँमा ५ सय, त्यैपनि सिटमा बस्न पाइने होइन, खुट्टा टेक्ने ठाउँ मात्र ।’
बसले मात्रै होइन दशैं हो भन्दै ट्याक्सी, जिप, भ्यान, ट्रक लगायतले समेत मनोमानी भाडा असुल्ने गरेको यात्रुहरुको गुनासो छ । ‘४ घण्टा बाटोमा बस कुरे, कुनैले रोकेनन’ देउरालीका समिर श्रेष्ठले भने ‘बोलेरोको पछाडी झुण्डिएर ७ सय तिरेर आएँ ।’
यता सदरमुकामबाट जिल्ला बाहिर जाने सवारी साधनले पनि आफुखुसी भाडा लिने गरेको पाइएको छ । काउण्टरबाट आफ्ना चिनेजानेका र आसेपासेलाई मात्रै टिकट दिने गरेको र अन्यलाई भने टिकट बुक भइसक्यो भन्दै फर्काउने गरेको यात्रुहरुको दुखेसो छ ।
‘काउण्टरबाटै टिकट फुल भइसक्यो भनेर फर्काए’ काठमाण्डौ जान हटरमटारीमा बस कुरिरहेकी हिरा अधिकारी भन्छिन् ‘पछिपछि बसवाला आएर रिजर्भ बस छ, जाने भए ७ सय लाग्छ भने ।’ जिल्लामा मनोमानी भाडाको समस्या यो नै पहिलो भने होइन । अघिल्ला बर्षहरुमा समेत यातायात ब्यवसायीहरुले यात्रुलाई दशैका नाममा ठग्दै आएका छन् ।
हाल यात्रुवहाक बस, माइक्रो, जिप लगायतले क्षमताभन्दा बढी यात्रु चढाएर जोखिमपूर्ण यात्रा समेत गराइरहेको पाइएको छ । ‘३०÷३५ जना बोक्ने बसले ५०÷५५ जनाभन्दा बढि मान्छे हालेको छ, कच्चि बाटो त्यै माथी अवस्था यस्तो छ’ बुंकोटकी सृजना बिकले भनिन् ‘गाडी चढेदेखि नझरुञ्जेल साह्रै तनाव हुने, चढे पनि नहुने, नचढे पनि नहुने ।’ सकसपूर्ण यात्रासंगै झुण्डिएर यात्रा गर्नुपर्दा गन्तब्यसम्म पनि नपुगिने होकी भन्ने त्रास यात्रुहरुमा छ ।
