गोरखा समाचारदाता
गोरखा – चाडबाडको अन्त संगै सार्वजनिक सवारी साधानमा यात्रागर्नेहरुको गुनासो पछि जिल्लाको विभिन्न स्थानमा छडके चेकजाँच गरीएको छ । चेक जाँचका क्रममा कुनै पनि यात्रुबाट बढी भाडा नलिएको पाईएको छ ।
जिल्ला ट्राफिक प्रहरी कार्यालयको आग्रहमा जिल्ला प्रहरी कार्यालय र जिल्ला प्रशासनको टोलीले ६ स्थानमा छडके चेकजाँच गरेको थियो । ‘सिडियो साप र एसपी साप सहितको उपस्थितीमा हामीले हरमटारी, लक्ष्मी बजार, १२ किलो बजार, छेवेटार, मझुवा देउराली र आहाले बजारमा चेकजाँचका साथै यात्रु संग सोधपुछ गरेका थियौ । कुनै पनि यात्रुले आफुहरुबाट बढी भाडा नलिएको’ जानकारी जानकारी दिएको जिल्ला ट्राफिक प्रहरी कार्यालय गोरखा ट्राफिक प्रहरी टिका शर्माले बताए ।
हिन्दु नेपालीहरुको महान चाड सकेर कामको सिलसिलामा फकर्ने क्रममा यात्रुहरुबाट डबल सम्म भाडा असुलेको जानकारी पाए पछि संयुत्त टोलीले सवारीमा यात्रा गर्ने सर्व साधारणलाई सोधपुछ गरेको थियो । तर कुनै पनि यात्रुले बढी भाडा असुलेको जानकारी नदिए पछि ५० सवारीलाई सचेत गराईएको ट्राफिक प्रहरी शर्माले जानकारी दिए ।
प्रमुख जिल्ला अधिकारी देवेन्द्र लामिछाने र प्रहरी उपरिक्षक ओमप्रकाश अधिकारी सहित रहेको चेकजाँचमा लामिछाने र अधिकारीले यात्रुलाई भाडा र यात्राका क्रममा सवारी भित्र हुने ब्यवहारको बिषयमा जानकारी लिएका थिए ।
उत्त टोलीले चेकजाँचका क्रममा ३ वटा बोलेरो जिप र २ वटा बसलाई भने सिट क्षमता भन्दा बढी यात्रु राखेर यात्रा गराएको भन्दै चेकजाँकै क्रममा कारवाही गरेको थियो ।
उत्त सवारी साधानहरुलाई यातायाता ब्यवस्था ऐन २०४९ को कसुरमा कारवाही गरी प्रहरी सवारी १ हजार ५०० जरीवाना गरीएको जिल्ला ट्राफिक प्रहरी कार्यालयले जानकारी दिएको छ ।
साथै चेकजाँच कै क्रममा अन्य १५ सवारी साधनलाई लाईट नबोलेको, सवारी कागजपत्र साथमा लिएर नहिडेको, चालक अनुमती पत्र विना सवारी चलाएको भन्दै कारवाही गरेको थियो ।
