गोरखा समाचारदाता
गोरखा – चाडवाड नजिएसंगै जिल्लामा सञ्चालित यातायातका साधानलाई ब्यवस्थित बनाउन सरोकारवालाहरुविच छलफल भएको छ ।
जिल्ला प्रशासन कार्यालय गोरखाको अगुवाईमा बुधबार भएको बैठकमा सार्वजानिक यातायातलाई थप ब्यवस्थित, मर्यादित र सहज बनाउने बारे छलफल भएको हो ।
प्रमुख जिल्ला अधिकारी देवेन्द्र लामिछानेको अध्यक्षतामा भएको बैठकमा यातायातका साधनहरुमा निर्धारित भाडादर सम्पूर्ण यात्रुहरुले देख्ने स्थानमा टाँस गर्न, बढी भाडा लिने सवारीलाई कारबाही गर्न, तोकिएको स्थान र समयमा सवारी चलाउन यातायात ब्यवसायीहरुलाई निर्देशन दिइएको छ ।
त्यस्तै महिला अपांग, जेष्ठ नागरिकका लागि छुट्याइएको सिटमा लक्षित वर्गलाई राख्ने गरी कार्यान्वयन गराउन, लक्षित वर्गलाई दिइदै आएको भाडादरमा छुटको ब्यवस्थालाई पालना गर्न समेत निर्देशन दिइएको छ ।
जसको अनुगमनका लागि जिल्ला ट्राफिक कार्यालय गोरखालाई जिम्मेवारी दिइएको छ । बैठकमा जिल्लामा सार्वजानिक यातायात सञ्चालन गरिरहेको दरौदी, पृथ्वी, गोरखा मनकामना यातायात प्रालिका प्रतिनिधीको सहभागिता रहेको थियो ।
त्यस्तै नेपाल प्रहरी, नेपाली सेना, राष्ट्रिय अनुसन्धान, नेपाल पत्रकार महासंघ, उपभोक्ता हकहित संरक्षण समिति, नागरिक समाजका प्रतिनिधीहरुको समेत बैठकमा उपस्थिती रहेको बताइएको छ ।
