गोरखा समाचारदाता
गोरखा – सदरमुकाममा सञ्चालित दशै सस्तो मेलामा राखिएका केहि फुड स्टलहरुमा अखाद्य बस्तु भेटिएका छन् ।
गोरखा नगरपालिकाका प्रशासकिय अधिकृत चेतप्रसाद अम्गाईको नेतृत्वको टोलीले बुधबार मेलास्थलमा राखिएका स्टलको अनुगमनका क्रममा केहि स्टलहरुमा सिल, समयसिमा नभएका लगायतका सामाग्री भेटिएका हुन् ।
त्यस्तै अनुगमनका क्रममा मेला स्थलमा रहेका अधिकांश होटलका खानेकुराहरु खान योग्य नदेखिएको बताइएको छ । ‘मेलामा राखिएका अधिकांश होटलमा पकाइएका खानेकुराहरु सफा र फ्रेस पाइएन’ अम्गाइले भने ‘नछोपि राखिएका, धुलो टासिएका, वासी खानेकुराहरु देखिएकाले एक पटकलाई चेतावनी दिएका दिएर छोडेका छौ ।’
मेलामा रहेका झण्डै २ सय भन्दा बढी स्टलमध्ये करिब ५० स्टलको बुधबार अनुगमन गरिएको हो ।
मेलामा ल्याइएका केहि स्टलले लत्ताकपडा, भाडाकुडामा समेत बजार मुल्यभन्दा बढी रकम असुल गरेको पाइएको छ । ‘सस्तो मेलामा बजारमा भन्दा केहि सस्तो त हुनु परयो नि’ उनले भने ‘केहिले बजारमा भन्दा पनि बढी रकम असुल गरेको पाइएकोले आयोजकलाई जानकारी गराएका छौ ।’
त्यस्तै मेलामा विक्रीका लागि राखिएको आइज गोला लगायतका सामाग्रीहरु समेत खान योग्य नभएकाले बन्द गराउन आयोजकलाई निर्देशन दिइएको छ । ‘आइस गोला लगायत सिसीमा राखिएको खुल्ला अचारहरु खान योग्य छैनन, न डेट छ, न सिल छ’ प्रशासकिय अधिकृत अम्गाईले भने ‘त्यस्ता चिज राखेको स्टल नै बन्द गराउन आयोजकलाई हामीले भनिसकेका छौ ।’ अनुगमनमा जिल्ला प्रशासन कार्यालय, जिल्ला प्रहरी कार्यालय, पत्रकार लगायतको सहभागिता रहेको थियो ।
