गोरखा समाचारदाता
गोरखा – जिल्लाका एम्बुलेन्सलाई ब्यवस्थित रुपमा सञ्चालन गर्न सदरमुकाममा छलफल भएको छ ।
नेपाल रेडक्रश सोसाइटी जिल्ला शाखाको आयोजनामा बिहिबार एम्बुलेन्स सञ्चालक, चालकका साथै सरोकारवालाहरुका बिच अन्तरकृया सम्पन्न भएको हो ।
रेडक्रश गोरखाका सभापति भगवानबाबु मास्केको अध्यक्षतामा भएको कार्यक्रममा प्रमुख जिल्ला अधिकारी देवेन्द्र लामिछानेको प्रमुख आतिथ्यता रहेको थियो ।
जिल्लाका बिभिन्न संघसस्थाहरुले सञ्चालन गरेका एम्बुलेन्सहरुमा बेतिथी रहेको भन्ने जनगुनासो आइरहेका बेला रेडक्रशले ब्यवस्थित रुपमा सञ्चालन गर्न पहल गरेको हो ।
पछिल्लो समय एम्बुलेन्सहरुलाई भाडामा लगाई सञ्चालन गर्ने, जिल्ला सदरमुकामबाट मात्रै सञ्चालन हुने, अक्सिजन लगायत अत्यावस्यक सामाग्री विनै सञ्चालन हुने, भाडादरमा एकरुपता नहुने, समयमा फोन नउठ्ने लगायतका समस्या देखिएदै आएका थिए ।
कार्यक्रममा जिल्लाभरका एम्बुलेन्स सञ्चालक, चालक लगायत सरोकारवालाहरुको उपस्थिती रहेको थियो ।
कार्यक्रममा एम्बुलेन्स चालकले आफुहरुको सेवा सुविधा कम भएको समेत गुनासो गरेका छन् ।
स्वास्थ्य कार्यालय गोरखाको समन्वयमा भएको कार्यक्रममा एम्बुलेन्स सञ्चालन निर्देशिका २०७३ का बारेमा समेत सञ्चालक र चालकलाई अभिमुखिकरण गराइएको छ ।
कार्यक्रममा सञ्चालक निर्देशिकाका बारे स्वास्थ्य कार्यालयका जनस्वास्थ्य निरिक्षक नवराज खड्काले सहजीकरण गरेका थिए ।
त्यस्तै चालकहरुलाई ट्राफिक नियमका बारे समेत जानकारी गराइएको छ ।
जिल्ला ट्राफिक प्रमुख सुकबहादुर विकले उनिहरुलाई नियमका बारे बताएका हुन् ।
केहि दिनभित्र अनुगमन समितिले मापदण्डमा रहि सञ्चालनमा रहेका र नरहेका एम्बुलेन्सको पहिचान गरी प्रतिवेदन तयार गरी आवस्यक कारवाहीको प्रकृयामा जाने तयारी भएको कार्यालयका जनस्वास्थ्य निरिक्षक खड्काले बताए ।
