मोहसिन अलि मियाँ
गोरखा – गण्डकी प्रदेशका भुमि ब्यवस्था, कृषि तथा सहकारी मन्त्री लेखबहादुर थापाले युवालाई कृषि क्षेत्रमा लाग्ने वातावरण बनाउनुपर्ने बताएका छन् । मेला उद्घाटन कार्यक्रममा बोल्दै थापाले कृषि क्षेत्रको विकास नभई देशमा सम्बृद्धि नआउने भन्दै समेत बताए ।
उत्पादन र विकासको अथाह सम्भावना रहेपनि गोरखाको उचित बजार र प्रचार नहुदा पछि परेको भन्दै उनले कृषिको ब्यवस्थापन, प्रशोधन, प्रविधी र ब्यवसायिकिकरणलाई प्राथमिकता दिएर सरकार अघि बढेको जानकारी दिए ।
आगामी बर्षका लागि सरकारले घोषणा गरेको पर्यटन बर्ष गोरखामा २ लाख पर्यटन भित्राउने गरी सबैले एकतावद्ध भएर काम गर्नुपर्ने उनले बताए ।
फरक प्रशंगमा बोल्दै मन्त्री थापाले पछिल्लो समय गणतन्त्रको दुरुपयोग भइरहेको भन्दै संघियतापक्षधर एक ठाउँमा उभिनुपर्ने बताएका छन् ।
बुढीगण्डकी जलविद्युत आयोजनाका नाममा जनतालाई भ्रममा राख्न नहुने तर्क गर्दै उनले तत्काल मुआब्जा निर्धारण लगायतका समस्या हल गरी अघि बढ्न उर्जा मन्त्रालय र जिल्ला प्रशासन कार्यालयलाई आग्रह समेत गरेका छन् ।
त्यस्तै कार्यक्रममा गण्डकी प्रदेश सभा सदस्य हरीशरण आचार्यले सरकारको सम्बृद्धिको नाराले सार्थकता पाउन नसकेको टिप्पणी गरेका छन् ।
‘भएको एक मात्र गोरखकाली रबर उद्योग चलाउन नसक्ने, बुढीगण्डकी आयोजना अलपत्र पार्ने, मनासलु पदमार्गमा पहिरो समेत हटाउन नसक्ने सरकारले के को सम्बृद्धिको नारा गर्नु’ साँसद आचार्यले भने ‘आन्तरिक भ्रमण बर्ष घोषणा गर्दैमा पर्यटक आउदैनन् त्यसका लागि तयारी चाहिन्छ, योजना आवस्यक छ ।’
