नरेन्द्र ढकाल
गोरखा – जिल्ला अस्पताल गोरखाको सञ्चालन तथा व्यवस्थापन समितिले मनोमानी गरेको स्रोतले बताएको छ । समितिले मनोमानी ढङ्गले बिना प्रतिस्पर्धा अस्पताल हाता भित्र एक व्यक्तिलाई चमेना गृह सञ्चालनको अनुमती दिएको छ ।
‘हामी लामो समय देखि यही क्षेत्रमा व्यवसाय गर्दै आइरहेका छौं, हस्पिटलले क्यान्टिनका लागि कहिले टेण्डर खुलायो थाहा छैन’ अस्पताल हाता बाहिरका एक व्यापारीले नाम नबताउने शर्तमा भने ‘अहिलेको समितिले मनपरी ढङ्गले आफ्ना मान्छेका लागि मात्र काम गरेको जस्तो देखिन्छ ।’
२०७२ बैशाख १२ गते गएको बिनाशकारी भूकम्पले भत्किएको गोरखा जिल्ला अस्पताल अहिले पुनःनिर्माण भइरहेको छ । सोही क्रममा अस्पतालले उत्तर पश्चिम (बोसेधारा मुनी) गेट नजिकै एक व्यक्तिका लागि चमेना गृह सञ्चालन गर्न अनुमती दिएको छ ।
त्यहाँका स्थानीय होटल व्यवसायी रेवती घिमिरेले अहिले क्यान्टिन सञ्चालनका लागि टूष्ट राखिएको भवन बनाउदैछन् । ‘हामीले सुचना ननिकालेको साँचो हो । तर सिधै उहाँलाई दिएको चाँही होइन’ अस्पताल व्यवस्थापन तथा सञ्चालन समितिका अध्यक्ष पुरुषोतम अर्यालले भने ‘सेवा क्षेत्रका होटल व्यवसायी बसेर घिमिरेजीलाई छनौट गर्नुभएको हो ।’
जग्गाको मासिक ५ हजार भाडा दिने, आफैले भवन बनाउने र पछि भत्काएर लैजाने सर्तमा दिएको समितिको भनाई छ । ‘अहिले अस्थायी रुपमा दिएका हौं, म्याक्सिम तिन महिना भनेको छ’ अध्यक्ष अर्यालले भने ‘त्यसपछि पत्रिकामा सूचना निकालेर मापदण्ड अनुसार टेण्डर गछौं, अहिले बिरामीलाई जाउलो खाने वातावरण मात्र सिर्जना गरेका हौं ।’
अस्पतालले मनोमानी ढङ्गले उक्त कार्य गरेको भन्दै सर्वत्र आलोचना भएको छ । कतिपय व्यक्तिहरुले सामाजिक सञ्लालमा उक्त विषयमा बहस समेत चलाएका छन् ।
विज्ञापन नखुलाई गोप्य रुपमा आफ्ना मान्छेलाई जागिर समेत खुबाएको अस्पताललाई आरोप लागेको छ । केही महिना यता समितिले स्वम्सेवक भन्दै ४ जनालाई नियुक्ति दिएको छ ।
दुई महिना यता काउन्टरमा शिशिर अर्याल, फार्मेसीमा सूर्यकुमार श्रेष्ठ, बिमामा संगिता अर्याल र डूेसिङमा सुजन न्यौपानेलाई भर्ना गरिएको छ । ‘विज्ञापन नै नगरी उनीहरुलाई सुटुक्क राखियो’ श्रोतले भन्यो ‘अनिपछि तलबभत्ताको निर्णय गर्ने गरेको छ भन्ने सुनेका छौ ।’ उनीहरु अधिकाशं त्यहीँ कार्यरत अन्य कर्मचारी र समितिका पदाधिकारी सदस्यहरुका आफन्त रहेको बताइएको छ ।
यता अस्पताल व्यवस्थापन तथा सञ्चालन समितिले भने उल्लेखित व्यक्ति सबै सिक्नका लागि आएको दाबी गरेको छ । ‘तिनीहरु फाल्टु रहेछन् काम सिक्न पाउँ भनेर अनुरोध गरेपछि दियौं’ अध्यक्ष अर्यालले भने ‘उनीहरुलाई हामीले नियुक्ति दिएको छैनौं ती मध्ये बिमाको त हटिसकेका छन्, अरुपनि बिस्तारै हटाउँछन् ।’
